پاکستان کرکٹ ٹیم کے اوپنر فخر زمان ٹی ٹوئنٹی ایشیاکپ 2022 کے سپر فور مرحلے میں پہنچنے کے لیے پرامید دکھائی دے رہے ہیں۔

قومی ٹیم کے اوپنر فخر زمان کا کہنا ہے کہ بھارت سے میچ کافی اچھا ہوا، ایک وقت میں لگ رہا تھا کہ میچ ہمارے ہاتھ میں آگیا ہے۔

انہوں نے کہا کہ ٹی ٹونٹی کرکٹ میں ایک کھلاڑی میچ کا پانسا پلٹ دیتا ہے، ٹیم ہونے کے ناطے ہم اچھا کھیلے ہیں جب کہ کلوز میچ ہونے کا یہ فائدہ ہوتا ہے کہ اگر ہم ہار بھی جائیں تو مورال بلند رہتا ہے۔

فخر زمان کہتے ہیں کہ ٹی ٹونٹی میں کسی بھی ٹیم کو آسان حریف نہیں سمجھنا چاہیے، ہانگ کانگ کوالیفائرز میں اچھا کھیل کرآئی ہے۔ کوشش کریں گے کہ میچ جیت کر سپر فور میں کوالیفائی کریں۔

ان کا کہنا تھا کہ انجریز تو کھیل کا حصہ ہیں جو آتی رہتی ہیں بس اس کو کنٹرول کرنا آنا چاہیے، میڈیکل ٹیم کھلاڑیوں کو فٹ کرنے کے لیے بہترین کام کررہی ہے۔

انہوں نے مزید کہا کہ ’میں امید کرتا ہوں ہمارے تمام کھلاڑی آئندہ میچز میں مکمل فٹ ہوں گے اور دستیاب ہوں گے۔

واضح رہے کہ ٹی ٹوئنٹی ایشیا کپ 2022 میں پاکستان ٹیم کا اگلا مقابلہ کل ہانگ کانگ سے جس میں جیتنے والی ٹیم سپر فور مرحلے میں کوالیفائی کرے گی جب کہ ہارنے والی ٹیم واپس وطن روانہ ہوگی۔

اس سے قبل پاکستان ٹیم کا مقابلہ روایتی حریف بھارت سے ہوا تھا جس میں بھارت نے پاکستان کو 5 وکٹوں سے شکست دی تھی۔