انگلش کرکٹ ٹیم کے قائم مقام کپتان معین علی کہتے ہیں میری فیملی پاکستان سے ہونا میرے لیے اعزاز کی بات ہے۔

انگلینڈ کرکٹ ٹیم کے قائم مقام کپتان معین علی کا کراچی میں پریس کانفرنس کرتے ہوئے کہنا تھا کہ کرس ووکس اور مارک ووڈ لمبی انجری کے بعد آرہے ہیں۔

ہم اپنے فاسٹ بولر کو احتیاط سے استعمال کرنا چاہتے ہیں، جب فاسٹ بولر تیار ہوں گے تب انہیں میچ کھلائیں گے۔

انہوں نے کہا کہ میری فیملی پاکستان سے ہونا میرے لیے اعزاز کی بات ہے جب کہ میرے دوست اور فیملی میری کپتانی پر کافی فخر محسوس کرتے ہیں۔

معین علی کہتے ہیں اب تک پچ کا معائنہ نہیں کیا لیکن کراچی کی کنڈیشنز کا اندازہ ہے، انگلش ٹیم کی سلیکشن پر تنقید کا جواب دیتے ہوئے انہوں نے کہا کہ مجھے نہیں لگتا یہ انگلینڈ کی بی ٹیم ہے۔

قائم مقام کپتان کا کہنا تھا کہ زیادہ تر کھلاڑی انجری کے باعث سیریز کا حصہ نہیں، صرف بین اسٹوکس آرام کے باعث سیریز نہیں کھیل رہے ہیں۔

ان کا کہنا ہے کہ یہ نوجوان کھلاڑیوں کے پاس موقع ہے کہ وہ اپنی صلاحیت دنیا کو دکھائیں جب کہ ہماری یہ ٹیم وائٹ بال کی بہترین ٹیم ہے۔

جوز بٹلر کی انجری کے حوالے سے انہوں نے کہا کہ ’جوز بٹلر کی انجری کے حوالے سے ابھی کچھ نہیں کہہ سکتے، ممکن ہے کہ وہ آخری دو میچز میں ٹیم میں آجائیں جب کہ ہم بٹلر کو ورلڈکپ کےلیے مکمل فٹ چاہتے ہیں‘۔

معین علی کا مزید کہنا تھا کہ مجھے نہیں لگتا اسپنرز سے اتنا فرق پڑے گا، ثقلین مشتاق کی ہم بہت عزت کرتے ہیں، جب وہ انگلینڈ کے کوچ تھے ہم نے ان سے بہت کچھ  سیکھا ہے۔

واضح رہے کہ انگلینڈ کرکٹ ٹیم 17 سال بعد پاکستان کا دورہ کررہی ہے جب کہ اس موقع پر دونوں ٹیموں کے درمیان 7 ٹی ٹوئنٹی میچز پر مشتمل سیریز کھیلی جائے گی۔

سیریز کے پہلے چار میچ کراچی میں کھیلے جائیں گے جب کہ بقیہ تین میچز لاہور میں ہوں گے۔ کراچی میں 20، 22، 23 اور 25 ستمبر کو میچز ہوں گے جب کہ لاہور میں 28، 30 ستمبر اور 2 اکتوبرکو میچز ہوں گے۔