ہانگ کانگ کے کھلاڑی بابر حیات نے ایشیاکپ 2022 میں پاکستان کے خلاف میچ سے قبل قومی ٹیم کے کپتان بابر اعظم کو دھمکی دے دی ہے۔

ہانگ کانگ کے مڈل آرڈر بیٹسمین بابر حیات کا جعرات کو پریس کانفرنس کرتے ہوئے کہنا تھا کہ آج کے میچ میں دباؤ صرف ہم پر نہیں بلکہ پاکستان ٹیم پر بھی ہوگا۔

پاکستان کے خلاف میچ سے قبل انہوں نے صحافیوں سے گفتگو کرتے ہوئے کہا کہ ’پاکستان کے خلاف مقابلہ ناک آؤٹ ہوگا جو کہ دونوں ٹیموں کے لیے ہائی پریشر گیم ہوگا۔

بابر حیات کہتے ہیں ’پاکستان ایک بڑی ٹیم ہے اور ان کے پاس اچھا بولنگ اٹیک ہے جو کہ شاید ٹورنامنٹ کا بھی بہترین بولنگ اٹیک ہو، لیکن ہم میچ جیتنے کی پوری کوشش کریں گے‘۔

ان کا کہنا تھا کہ کووڈ کی وجہ سے کھلاڑی کرکٹ سے دور رہے جس سے ان کی کرکٹ پر منفی اثر پڑا ہے۔

انہوں نے کہا کہ ہم نے گذشتہ چند سالوں میں کووڈ کی وجہ سے زیادہ کرکٹ نہیں کھیلی کیونکہ کووڈ کی وجہ سے ہانگ کانگ میں کافی پابندیاں عائد تھیں اور گراؤنڈز کو بند کردیا گیا تھا۔

ہانگ کانگ کے بلے باز کہتے ہیں کہ اس دوران ہم کبھی کبھار ہی کلب کرکٹ کھیلا کرتے تھے جس سے ہماری کرکٹ گری اور اب پابندیوں میں نرمی کے بعد ہم تین ماہ سے مسلسل کرکٹ کھیل رہے ہیں۔

واضح رہے کہ پاکستان اور ہانگ کانگ کے درمیان آج شارجہ میں فیصلہ کن میچ ہوگا جس میں جیتنے والی ٹیم پلے فور مرحلے میں کوالیفائی کرے گی جب کہ ہارنے والی ٹیم واپس وطن روانہ ہوگی۔

ہانگ کانگ کی شاندار فارم کو دیکھتے ہوئے ایک زبردست مقابلہ دیکھنے کو ملے گا جب کہ بھارت، افغانستان اور سری لنکا پہلے ہی پلے فور مرحلے میں کوالیفائی کرچکی ہیں۔