لاہور: 16 اکتوبر سے شروع ہونے والے آئی سی سی ٹی ٹوئنٹی ورلڈ کپ کے لیے قومی اسکواڈ کا اعلان کردیا گیا ہے۔

ٹی ٹوئنٹی ورلڈ کپ کے لیے پاکستان کرکٹ بورڈ نے 15 کھلاڑیوں پر مشتمل اسکواڈ کا اعلان کردیا ہے جس میں فاسٹ بولر محمد وسیم جونیئر اور شاہین شاہ آفریدی کے ساتھ ٹاپ آرڈر بلے باز شان مسعود ٹی ٹوئنٹی فارمیٹ کے لیے ٹیم میں شامل ہیں۔

Introducing our squad 🙌

🗒️ https://t.co/JnHpDOvXsS#T20WorldCup | #BackTheBoysInGreen pic.twitter.com/BbmTdtBfhk

Advertisement

— Pakistan Cricket (@TheRealPCB) September 15, 2022

اسکواڈ کی کپتانی بابر اعظم کے سپرد کی گئی ہے، نائب کپتانی کے فرائض شاداب خان انجام دیں گے جب کہ آصف علی اور حیدر علی کو بھی اسکواڈ میں شامل کیا گیا ہے۔

علاوہ ازیں اسکواڈ میں حارث رؤف، افتخار احمد، خوشدل شاہ، محمد حسنین، محمد نواز، محمد رضوان (وکٹ کیپر)، نسیم شاہ اور عثمان قادر شامل ہیں۔

فخرزمان، محمد حارث اور شاہ نواز دھانی کو ریزرو کے طور پر رکھا گیا ہے۔

چیف سلیکٹر محمد وسیم کا کہنا ہے کہ ہمارے پاس ایک مضبوط ٹیم ہے جو ٹی ٹوئنٹی ورلڈکپ میں بہترین کارکردگی کا مظاہرہ کرسکتی ہے۔

محمد وسیم کہتے ہیں ’اس وجہ سے ہم نے ان لڑکوں پر اعتماد کیا ہے جو  ورلڈ کپ 2021 کے بعد سے اسکواڈ کا حصہ رہے ہیں‘۔

انہوں نے کہا کہ ہم نے ان لڑکوں پر سرمایہ کاری کی ہے، اس لیے مناسب ہے کہ انہیں لڑکوں کو ورلڈ کپ میں اپنی صلاحیتیں دکھانے کا موقع ملے جس کے لیے انہوں نے سخت محنت اور تیاری کی ہے۔

شاہین شاہ آفریدی کے حوالے سے ان کا کہنا تھا کہ ’شاہین کے حوالے سے حوصلہ افزاء اطلاعات موصول ہورہی ہیں جب کہ وہ اگلے ماہ کے اوائل میں دوبارہ بولنگ شروع کرسکتے ہیں‘۔

واضح رہے کہ ٹی ٹوئنٹی ورلڈ کپ کے میچز 16 اکتوبر سے 13 نومبر تک آسٹریلیا میں کھیلے جائیں گے جس میں پاکستان کا پہلا مقابلہ 23 اکتوبر کو میلبورن میں بھارت کے خلاف ہوگا۔

دوسرا میچ پاکستان ٹیم 27 اکتوبر کو گروپ بی کی فاتح ٹیم سے کھیلے گی جب کہ تیسرا میچ 30 اکتوبر کو گروپ اے کی رنر اپ ٹیم سے ہوگا۔

چوتھا میچ 3 نومبر کو جنوبی افریقہ کے خلاف ہوگا جب کہ گروپ میچز کا پانچواں اور آخری میچ 6 نومبر کو بنگلادیش کے خلاف ہوگا۔