انگلینڈ کرکٹ بورڈ نے پی سی بی کو مستقبل میں پاک بھارت ٹیسٹ سیریز کے لیے غیر جانبدار میزبان بننے کی پیشکش کردی ہے۔

غیر ملکی خبر رساں ادارے کی جانب سے یہ رپورٹ سامنے آئی ہے جس میں ای سی بی کے ڈپٹی چیئرمین مارٹن ڈارلو نے پاکستان میں جاری ٹی ٹوئنٹی سیریز کے دوران یہ پیشکش کی ہے۔

          تاہم اب پاکستان کرکٹ بورڈ (پی سی بی) کا بھی واضح موقف سامنے آگیا ہے جس میں ان کا کہنا ہے کہ ’بھارت کو پاکستان آکر کھیلنا ہوگا‘۔

ایک بیان میں پی سی بی کے عہدیدار نے بتایا کہ ’ای سی بی کی جانب سے انگلینڈ میں پاک بھارت سیریز کی میزبانی کے لیے پیشکش کے حوالے سے بورڈ کے اندر کوئی بات چیت نہیں ہوئی ہے اور نہ ہی اس معاملے پر بی سی سی آئی سے کوئی بات ہوئی ہے‘۔

انہوں نے مزید کہا کہ اگر پاکستان بھارت کے خلاف اپنی ہوم سیریز کسی غیر جانبدار مقام پر کھیلتا ہے تو 2015 سے کرکٹ کو وطن واپس لانے کی ان تمام کوششوں کو بری طرح نقصان پہنچے گا۔

اس سے قبل بی سی سی آئی نے بھی اس پیشکش کا جواب دیتے ہوئے کہا تھا کہ مستقبل قریب میں ایسا ہونے کے امکانات موجود نہیں ہیں۔

یہ بھی پڑھیں: انگلینڈ نے پاکستان اور بھارت کو ٹیسٹ سیریز کی میزبانی کی پیشکش کردی

واضح رہے کہ دونوں ٹیموں نے اس سے قبل سال 2012 میں بھارت میں وائٹ بال سیریز کھیلی تھی جب کہ دونوں ٹیموں کے درمیان آخری ٹیسٹ سیریز 2007 میں ہوئی تھی۔