پاکستان اور بنگلادیش کے درمیان ہونے والی انڈر 19 سیریز کے لیے میچ آفیشلز کا اعلان کردیا گیا ہے۔

پاکستان کرکٹ بورڈ نے آج پاکستان اور بنگلادیش کے درمیان ہونے والی انڈر 19 سیریز کے لیے میچ آفیشلز کا اعلان کردیا ہے جب کہ دونوں ٹیموں کے درمیان ایک چار روزہ میچ، 45 اوورز پر مشتمل تین ون ڈے میچز اور دو ٹی ٹوئنٹی میچز کھیلے جائیں گے۔

امپائر راشد ریاض، شوزب رضا اور ولید یعقوب آن فیلڈ اور ریزرو امپائر کے فرائض انجام دیں گے جب کہ تمام چھ میچز میں ریفری کے فرائض پروفیسر محمد جاوید ملک انجام دیں گے جو پی سی بی ایلیٹ پینل آف میچ ریفریز اور انٹرنیشنل پینل آف آئی سی سی میچ ریفریز کے رکن ہیں۔

واضح رہے کہ فیصل آباد کے اقبال اسٹیڈیم میں شیڈول ہونے والے میچز اب ملتان اسٹیڈیم میں منتقل کردیے گئے ہیں جب کہ تمام میچز اپنے شیڈول کے مطابق ہی ہوں گے۔

دونوں ٹیموں کے درمیان پہلے چار روزہ میچ 4 سے 7 نومبر تک کھیلا جائے گا جب کہ پہلا ون ڈے 10 نومبر، دوسرا 12 نومبر اور تیسرا 14 نومبر کو کھیلا جائے گا۔

علاوہ ازیں دونوں ٹیموں کے درمیان کھیلے جانے والے دو ٹی ٹوئنٹی میچز 16 اور 18 نومبر کو کھیلے جائیں گے۔

          دوسری جانب پاک بنگلادیش سیریز کی وجہ سے ملتان اسٹیڈیم میں کھیلے جانے والے قائد اعظم ٹرافی کے میچز اب لاہور کے ایل سی سی اے گراؤنڈ میں منتقل کردیے گئے ہیں۔