پاکستان کے سابق تیز رفتار باؤلر محمد سمیع نے کہا کہ ٹی ٹوئنٹی ورلڈ کپ میں شاہین شاہ آفریدی کی موجودگی سے باؤلنگ کمبی نیشن مہلک ہو گا۔

تفصیلات کے مطابق شاہین شاہ آفریدی کو گھٹنے کی انجری کے باعث ایشیا کپ، انگلینڈ سیریز کے ساتھ ساتھ حالیہ سہ فریقی سیریز سے بھی باہر ہونا پڑا تھا۔

بائیں ہاتھ کے پیسر کو فوری طور پر ان کے زخمی گھٹنے کی بحالی کے لیے لندن بھیجا گیا تھا اور اب وہ مکمل طور پر صحت یاب ہو چکے ہیں۔

پاکستان کے ورلڈ کپ مہم سے قبل افغانستان اور انگلینڈ کے خلاف دو وارم اپ میچز ہیں جہاں ٹیم انتظامیہ آفریدی کی فٹنس لیول کی نگرانی کرے گی۔

محمد سمیع نے ایک یوٹیوب چینل کو انٹرویو دیتے ہوئے کہا کہ پاکستان کو شاہین آفریدی کی اپنی ٹیم میں ضرورت تھی اور ہمارے پاس اسٹرائیک باؤلر کی کمی تھی۔

محمد سمیع کے مطابق حارث رؤف اور وسیم جونیئر اچھی کارکردگی کا مظاہرہ کر رہے ہیں اور اگر آپ شاہین کو لاتے ہیں تو یہ مجموعہ مہلک ہو جائے گا.

محمد سمیع جو اس وقت مردان واریئرز کے ساتھ ان کے باؤلنگ کوچ کے طور پر کام کر رہے ہیں، نے کہا کہ پاکستان جونیئر لیگ کے انعقاد کے فیصلے سے نوجوان کھلاڑیوں کو بہت زیادہ فائدہ پہنچے گا۔

محمد سمیع نے مزید کہا کہ مجھے لگتا ہے کہ ہمیں اس لیگ سے بہت سارے اچھے کھلاڑی ملیں گے، ہمارا ملک ٹیلنٹ سے بھرا ہوا ہے لیکن انہیں ایک پلیٹ فارم اور رہنمائی کی ضرورت ہے تاکہ وہ مستقبل میں اچھی کارکردگی کا مظاہرہ کر سکیں۔