سابق آسٹریلوی کپتان ٹم پین غیر اخلاقی ٹیکسٹ اسکینڈل کے بعد کرکٹ میں واپسی کررہے ہیں۔

سابق آسٹریلوی کپتان ٹم پین غیر اخلاقی ٹیکسٹ اسکینڈل کی وجہ سے اپنے بین الاقوامی کیریئر کے خاتمے کے بعد پہلا ٹاپ لیول میچ کھیلنے کے لیے تیار ہیں۔ انہیں شیفیلڈ شیلڈ ٹائی کے لیے تسمانیہ کی ٹیم میں شامل کیا گیا ہے۔

واضح رہے کہ ٹم پین نے غیر اخلاقی ٹیکسٹ کا اسکینڈل منظر عام پر آنے کے بعد گذشتہ سال نومبر میں انگلینڈ کے خلاف ایشز سیریز سے قبل ٹیسٹ کپتانی سے استعفیٰ دے دیا تھا۔

آسٹریلوی میڈیا رپورٹ کے مطابق ٹم پین نے 18-2017 کی ایشیز سیریز کے دوران کرکٹ تسمانیہ کی ایک سابق خاتون ملازم کو نازیبا پیغامات بھیجے تھے۔

ایشز 2021 سیریز سے قبل ٹم پین کی اپنے ہی کلب تسمانیہ کی سابق ملازمہ کو نازیبا پیغامات بھیجنے کی تصاویر وائرل ہوئی تھیں۔

خیال رہے کہ ٹم پین کرکٹ تسمانیہ کی سابقہ ملازمہ کو نازیبا پیغامات بھیجنے کا نہ صرف اعتراف کرچکے ہیں بلکہ اس واقعے پر انہوں نے معافی بھی مانگی تھی۔

ٹیم پین تسمانیہ کی ریاستی ٹیم کے ساتھ ایک غیر معاہدہ کھلاڑی کے طور پر تربیت لے رہے ہیں، انہوں نے گذشتہ ہفتے کے آخر میں کلب کی جانب سے کھیلتے ہوئے نچلی سطح کی کرکٹ میں واپسی کی ہے۔

یاد رہے کہ ٹم پین کو 2018 میں بال ٹیمپرنگ اسکینڈل کے بعد آسٹریلوی ٹیم کی ساکھ کو بحال کرنے کے لیے مقرر کیا گیا ہے جب کہ بال ٹیمپرنگ اسکینڈل کے باعث اسٹیو اسمتھ کو کپتانی سے محروم کیا گیا تھا۔