فیفا کے صدر گیانی انفانتینیو نے کہا ہے کہ انڈونیشیا کے فٹ بال اسٹیڈیم میں تماشائیوں کی ہلاکت سیاہ دن اور سمجھ سے بالا تر ہے۔
تفصیلات کے مطابق فیفا کے صدر گیانی انفانتینیو نے کہا کہ انڈونیشیا کے اسٹیڈیم میں بھگدڑ میں کم از کم 174 افراد کی موت فٹبال سے وابستہ تمام افراد کے لیے ایک سیاہ دن اور سمجھ سے باہر ایک المیہ ہے۔

واضح رہے کہ گزشتہ روز انڈونیشیا کے ملنگ شہر میں ہفتے کی رات پیش آنے والا سانحہ میں 174 افراد ہلاک اور 180 افراد زخمی بھی ہوئے تھے۔

فیفا کے صدر نے کہا کہ یہ دنیا کے مہلک کھیلوں کے اسٹیڈیم آفات میں سے ایک تھا۔

گیانی انفانتینیو نے مزید کہا کہ انڈونیشیا میں کنجوروہان اسٹیڈیم میں اریما ایف سی اور پرسیبا سورابایا کے درمیان میچ کے اختتام پر پیش آنے والے المناک واقعات کے بعد فٹ بال کی دنیا صدمے کی حالت میں ہے۔

فیفا صدر کا کہنا تھا کہ ہمارے تمام خیالات اور دعائیں متاثرین، زخمی ہونے والوں اور جمہوریہ انڈونیشیا کے لوگوں کے ساتھ ہیں۔

اسپین میں لا لیگا اور ہسپانوی فٹ بال فیڈریشن نے اعلان کیا کہ سب سے اوپر دو ڈویژنوں میں اختتام ہفتہ کے باقی میچوں سے قبل ایک منٹ کی خاموشی اختیار کی جائے گی۔

اطالوی فٹ بال لیگ سیری اے نے ٹویٹ کرکے اپنی ہمدردی کا اظہار کیا۔

آفیشل لیگا سیری اے نے کہا کہ متاثرین، خاندانوں اور انڈونیشیا کے ملنگ میں ہونے والے سانحے سے متاثرہ ہر فرد کے لیے اپنی تعزیت اور خیالات بھیج رہے ہیں۔