معروف بھارتی مسلمان رہنما اسد الدین اویسی نے بھارتی کرکٹ بورڈ کو ایک ٹی وی پروگرام میں کھری کھری سنا دی۔

تفصیلات کے مطابق اسد الدین اویسی نے ایک ٹی وی پروگرام میں بھارتی کرکٹ بورڈ پر طنز کرتے ہوئے کہا ہے کہ بھارتی ٹیم آسٹریلیا میں پاکستان کے ساتھ کرکٹ میچ کیوں کھیل رہی ہے؟ اسے وہاں بھی نہیں کھیلنا تھا۔

اسد الدین اویسی نے کہا کہ ملک میں ایک ہی رٹ ہے کہ پاکستان کے ساتھ مت کھیلو، لیکن پاکستان کے ساتھ بھارت نیوٹرل مقام پر کرکٹ کھیلتا ہے، یہ کیوں ہمیں بے وقوف بنانے کی کوشش کر رہے ہیں۔

حیدرآباد کے ایم پی اور اے آئی ایم آئی ایم کے سربراہ اسد الدین اویسی نے بھارت اور پاکستان کے درمیان ٹی 20 ورلڈ کپ کے میچ پر بی سی سی آئی پر سخت الفاظ میں طنز کیا۔

 اویسی نے کہا ہے کرکٹ بورڈ نے فیصلہ کیا ہے کہ ایشیا کپ کھیلنے پاکستان نہیں جائیں گے، مگر آسٹریلیا میں اس کے ساتھ کھیلیں گے، واہ کیا محبت ہے۔

اسد الدین اویسی کا کہنا تھا کہ اگر آپ پاکستان کے ساتھ نہیں کھیلیں گے تو کیا ہوگا، ٹیلی ویژن کو 2000 کروڑ کا نقصان ہی تو ہوگا، لیکن کیا یہ بھارت سے زیادہ معنی رکھتا ہے؟

ٹی وی پروگرام میں اسد الدین اویسی سے پوچھا گیا کہ ٹی ٹوئنٹی ورلڈ کپ کا میچ کون جیتے گا، بھارت یا پاکستان؟ اس پر ان کا کہنا تھا کہ ‘میں نہیں جانتا کہ میچ کون جیتے گا، لیکن میں چاہتا ہوں کہ بھارت جیتے اور ہمارے محمد شامی اور سراج جیسے بچے پاکستان کو کچل دیں۔’ اس دوران انھوں نے مسلم کھلاڑیوں کی ٹرولنگ کا معاملہ بھی اٹھایا۔

حیدرآباد کے رکن پارلیمنٹ نے کہا کہ اگر بھارت جیت گیا تو یہ لوگ سینہ زوری کریں گے اور اگر بھارت ہار گیا تو یہ لوگ تلاش شروع کردیں گے کہ قصور کس کا تھا۔

اسد الدین اویسی نے واشگاف الفاظ میں کہا کہ اگر بھارت ہار گیا تو آپ کو کرکٹ کے ساتھ ہمارے حجاب اور داڑھی سے بھی دقت ہو گی۔