ویمنز ایشیاکپ کے میچ میں تھائی لینڈ نے پاکستان کو شکست دے کر اپ سیٹ کردیا ہے۔

بنگلادیش میں ٹی ٹوئنٹی ویمنز ایشیاکپ جاری ہے جس میں پاکستان کا مقابلہ 13 ویں نمبر کی ٹیم تھائی لینڈ سے ہوا۔

پاکستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 116 رنز اسکور کیے، پاکستان کی جانب سے سدرہ امین نے سب سے زیادہ 64 گیندوں پر 56 رنز اسکور کیے جب کہ منیبا علی 15 اور ندا ڈار نے 12 رنز بنا سکیں۔

ہدف کے تعاقب میں تھائی لینڈ نے 4 وکٹوں کے نقصان پر مقررہ ہدف ایک گیند پہلے پورا کرلیا جب کہ پاکستان کی جانب سے طوبیٰ اور ندا نے دو دو کھلاڑیوں کو آؤٹ کیا۔

پاکستان کی شکست اور تھائی لینڈ کے اپ سیٹ پر سابق کپتان ثنا میر کا بیان سامنے آگیا ہے جس میں انہوں نے تھائی لینڈ کی فتح کو تاریخی قرار دیا ہے۔

سماجی رابطے کی سائٹ پر ثنا میر کا کہنا تھا کہ اوسط سے کم منصوبہ بندی اور اس پر عمل درآمد پاکستان کو لے ڈوبی ہے۔

Congratulations to Thailand for the historic win vs Pakistan. Brilliant batting by @NatthakanJeans. Below average planning and execution from Pakistan. Why would you drop Sadia Iqbal from XI after you have dropped Anam Amin from the squad on low pitches?

— Sana Mir ثناء میر (@mir_sana05) October 6, 2022

ان کا تنقید کرتے ہوئے کہنا تھا کہ لو پچز پر انعم امین کو ٹیم سے ڈراپ کرنے کے بعد سعدیہ اقبال کو بھی میچ کے لیے ٹیم میں شامل نہیں کیا گیا۔

واضح رہے کہ ویمنز ایشیاکپ میں پاکستان نے اب تک 3 میچز کھیلے ہیں جس میں 2 میں کامیابی جب کہ ایک میں ناکامی کا سامنا کرنا پڑا۔