ٹی ٹوئنٹی ورلڈ کپ کے سپر 12 مرحلے کے میچ میں آسٹریلیا نے آئرلینڈ کو شکست دے دی ہے۔

آسٹریلیا میں ٹی ٹوئنٹی ورلڈ کپ کے سپر 12 مرحلے کے میچز جاری ہیں جس میں برسبین اسٹیڈیم میں میزبان ٹیم آسٹریلیا اور آئرلینڈ کے درمیان میچ کھیلا گیا۔

اس میچ میں آئرلینڈ نے ٹاس جیت کر پہلے فیلڈنگ کرنے کا فیصلہ کیا جس کے بعد آسٹریلیا نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 179 رنز اسکور کیے۔

آسٹریلیا کی جانب سے کپتان ایرون فنچ نے عمدہ بیٹنگ کا مظاہرہ کرتے ہوئے 44 گیندوں پر 63 رنز اسکور کیے جب کہ مارکس اسٹونس نے 35 اور مچل مارش 28 رنز بناسکے۔

آئرلینڈ کی جانب سے بیری میکارتھی نے 3 کھلاڑیوں کو آؤٹ کیا جب کہ جوشوے لٹل نے 2 وکٹیں حاصل کیں۔

جواب میں آئرلینڈ کی پوری ٹیم 18.1 اوورز میں 137 رنز پر ڈھیر ہوگئی جب کہ لورکین ٹکر نے بہترین کارکردگی کا مظاہرہ کرتے ہوئے 71 رنز کی ناٹ آؤٹ اننگز کھیلی تاہم وہ بھی اپنی ٹیم کو شکست سے نہ بچاسکے۔

علاوہ ازیں گیرتھ ڈیلینی نے 14 رنز اسکور کیے جب کہ مارک اڈیر 11 رنز بناکر آؤٹ ہوئے، آسٹریلیا کی جانب سے پیٹ کمنز، گلین میکویل، مچل اسٹارک اور ایڈم زمپا نے 2،2 کھلاڑیوں کو آؤٹ کیا اور مارک اسٹوئنس نے 1 وکٹ حاصل کی۔

واضح رہے کہ گروپ 1 میں آسٹریلیا پوائنٹس ٹیبل پر دوسرے نمبر پر آگیا ہے اور آئرلینڈ کا تیسرا نمبر ہے جب کہ نیوزی لینڈ پہلے نمبر پر براجمان ہے۔