قومی کھلاڑیوں نے زمبابوے اور نیدرلینڈز کے خلاف بھاری مارجن سے جیت کے لیے تیاریاں شروع کردیں ہیں۔

پاکستان کرکٹ ٹیم نے زمبابوے اور نیدر لینڈز کے خلاف میچ کے لیے پلان تیار کرلیا ہے جب کہ اس میچ میں قومی ٹیم کو بڑے مارجن سے جیت کی ضرروت ہے۔

پاکستان کرکٹ ٹیم 27 اکتوبر کو زمبابوے اور 30 اکتوبر کو نیدر لینڈز سے مقابلہ کرے گی جو کہ پرتھ کے اوپٹس اسٹیڈیم میں کھیلے جائیں گے جب کہ ان میچز میں رن ریٹ بہتر بنانے پر توجہ دی جائے گی۔

قومی ٹیم بھارت کے ہاتھوں افتتاحی میچ میں شکست کے بعد بھرپور پریکٹس کررہی ہے، پرتھ کا موسم خوشگوار ہے اور ٹھنڈی ہواؤں کے ساتھ اگلے چند دنوں تک بارش کی کوئی پیش گوئی نہیں ہے۔

دوسری جانب ٹیم انتظامیہ نامکمل فٹنس والے کھلاڑیوں کو کھلانے سے کترا رہی ہے، فخر زمان اب تک مکمل طور پر فٹ نہیں ہوسکے ہیں جب کہ ان کی بحالی کا کام جاری ہے۔

پریکٹس کے دوران شاہین آفریدی کو بھی بھرپور پریکٹس کرتے ہوئے دیکھا گیا لیکن اب بھی ان کی فٹنس پر کئی سوالات اٹھ رہے ہیں جب کہ مہم میں کمزور ٹیموں کے خلاف انہیں آرام دیے جانے کا امکان ہے۔

اگر شاہین آفریدی کو آرام دیا جاتا ہے تو ممکنہ طور پر محمد وسیم جونیئر کو کھلایا جائے گا، آصف علی اور حیدر علی کی پرفارمنس بھی ٹیم انتظامیہ کے لیے تشویش کا باعث بن رہی ہے۔

پریکٹس کے دوران ٹیم کے مینٹور میتھیو ہیڈن اور بیٹنگ کوچ محمد یوسف بلے بازوں کی کارکردگی کا جائزہ لیتے ہوئے انہیں مشورے دیتے رہے جب کہ ہیڈکوچ ثقلین مشتاق بھی افتخار احمد اور خوشدل شاہ کو سلو بولنگ میں رہنمائی کرتے نظر آئے۔