پشاور زلمی پی ایس ایل 8 کے لیے وکٹ کیپر و بیٹر کامران اکمل کو برقرار نہیں رکھے گی۔

40 سالہ وکٹ کیپر و بیٹر کامران اکمل پی ایس ایل کے آغاز سے ہی پشاور زلمی کی ٹیم کا حصہ ہیں اور ان کے بنیادی رکن بھی مانے جاتے ہیں۔

مقامی نیوز چینل سے بات کرتے ہوئے کامران اکمل نے اعلان کیا ہے کہ وہ پی ایس ایل 8 کی ڈرافٹنگ میں حصہ لیں گے جو 18 نومبر کو ہونے کی توقع ہے۔

انہوں نے کہا کہ ’اب میں پشاور زلمی کا حصہ نہیں ہوں، ہیڈ کوچ ڈیرن سیمی نے مجھے بتایا ہے کہ پشاور زلمی پی ایس ایل 8 کے لیے مجھے برقرار نہیں رکھے گی‘۔

ان کا کہنا تھا کہ میں ڈرافٹ میں سلیکشن کے لیے دستیاب ہوں گا، دیکھتے ہیں کون سی فرنچائز مجھے چنتی ہے‘۔

علاوہ ازیں ٹوئٹر پر کامران اکمل نے پشاور زلمی کا بھرپور ساتھ دینے پر شکریہ ادا کیا، انہوں نے پشاور زلمی کے مالک جاوید آفریدی، ڈیرن سیمی، محمد اکرم اور وہاب ریاض کا بھی شکریہ ادا کیا۔

Goodbyes are always hard..it has been a wonderful 7 years journey with @PeshawarZalmi Thanks for always supporting me in my hard times in my highs and lows.i am and i always will be grateful to u all for believing in me.Special thanks @JAfridi10 M.Akram @darensammy88 @WahabViki

— Kamran Akmal (@KamiAkmal23) November 1, 2022

واضح رہے کہ پشاور زلمی نے گذشتہ سال کامران اکمل کو سلور کیٹیگری میں منتخب کیا تھا جس پر انہیں شدید مایوسی ہوئی تھی جب کہ انہوں نے پشاور زلمی سے کھیلنے سے بھی انکار کردیا تھا۔

تاہم کھلاڑیوں اور مینٹور کی پیشکش کے بعد انہوں نے پی ایس ایل 7 میں کھیلنے کا فیصلہ کیا۔

یاد رہے کہ کامران اکمل 74 اننگز میں 1972 رنز بناکر پی ایس ایل میں سب سے زیادہ رنز بنانے والے دوسرے کھلاڑی ہیں جب کہ انہوں نے لیگ میں سب سے زیادہ تین سنچریاں بھی اسکور کی ہیں۔