گریگ بار کلے بلا مقابلہ آئی سی سی کے دوبارہ چیئرمین منتخب ہوگئے ہیں جب کہ جے شاہ بااثر مالیاتی اور تجارتی امور کی کمیٹی کے سربراہ ہوں گے۔

گریگ بارکلے اپنے حریف زمبابوین کرکٹ کے چیئرمین تونگوا میکولانی کے دستبردار ہونے کے بعد بلا مقابلہ دو سال کے لیے ایک مرتبہ پھر آئی سی سی کے چیئرمین منتخب ہوگئے ہیں۔

گریگ بارکلے اب 2024 تک آئی سی سی کے چیئرمین کے طور پر اپنی خدمات انجام دیں گے۔

گریگ بارکلے کو 16 مضبوط ووٹوں کی حمایت حاصل تھی اور تونگوا میکولانی کو 6 ووٹوں کی حمایت حاصل تھی، یہ جاننے کے باجود بھی آئی سی سی بورڈ میں طویل مدتی ڈائریکٹر تونگوا میکولانی نے انتخاب میں حصہ لینے کا فیصلہ کیا تھا۔

تونگوا میکولانی کو ایشیائی بلاک کے کچھ چھوٹے بلاک کی حمایت حاصل تھی تاہم بی سی سی آئی نے ہمیشہ کی طرح ووٹنگ کے عمل میں بہت زیادہ اثر ڈالا۔

کرک انفو کی رپورٹ کے مطابق بی سی سی آئی بااثر مالیاتی اور تجارتی امور کی کمیٹی میں ایک اہم نشست حاصل کرنا چاہتا تھا جس میں وہ کامیاب بھی رہا۔

واضح رہے کہ بااثر مالیاتی اور تجارتی امور کی کمیٹی نہ صرف آئی سی سی کے ایونٹس کے لیے بجٹ مختص کرنے کا فیصلہ کرتی ہے بلکہ اس کی دیکھ بھال کے ساتھ ساتھ مجموعی آمدنی کو پول کے رکن ممالک میں تقسیم بھی کرتی ہے۔