بھارت کرکٹ بورڈ کا کہنا ہے کہ پاکستان اور بھارت کے درمیان آئی سی سی اور اے سی سی ایونٹس کے علاوہ کوئی سیریز کھیلنے کا سوال ہی پیدا نہیں ہوتا۔

گذشتہ کئی دنوں میں یہ بات زیرِ گردش ہے کہ آسٹریلوی آل راؤنڈر سائمن اوڈونل کے مطابق میلبرن اسٹیڈیم میں پاک بھارت ٹیسٹ میچ کے لیے بات چیت جاری ہے۔

سائمن اوڈونل کا کہنا ہے کہ پاکستان، بھارت اور آسٹریلیا کے درمیان ٹرائنگولر سیریز کا بھی امکان ہے اور ون ڈے سیریز بھی ممکن ہے۔

تاہم اب بی سی سی آئی کے ایک حکام کا بیان سامنے آیا ہے جس میں ان کا کہنا تھا کہ پاکستان اور بھارت کے درمیان آئی سی سی اور اے سی سی ایونٹس کے علاوہ کوئی سیریز کھیلنے کا سوال ہی پیدا نہیں ہوتا۔

انہوں نے کہا کہ بی سی سی آئی ایک نجی ادارہ نہیں بلکہ حکومتی پالیسیوں کا پابند ہے، اگر مودی حکومت اجازت نہیں دیتی تو دونوں ممالک کے درمیان کسی قسم کی سیریز کا امکان نہ ہونے کے برابر ہے۔

انہوں نے بتایا کہ باہمی میچز کے حوالے سے کوئی بات چیت نہیں ہورہی، رمیز راجہ نے اے سی سی میٹنگ کے دوران ٹرائنگولر سیریز کی تجویز دی تھی جس کو بھارتی حکومت نے مسترد کردیا تھا۔

واضح رہے کہ دونوں ٹیموں کے درمیان آخری ٹیسٹ میچ 2007 میں کھیلا گیا تھا جس کے بعد سے دونوں ٹیمیں صرف ون ڈے اور ٹی ٹوئنٹی میں ہی مدمقابل آئی ہیں۔