پاکستانی ٹیم اوور 50 کرکٹ ورلڈ کپ ٹورنامنٹ میں شرکت کرے گی جو 6 مارچ 2023 سے 20 مارچ 2023 تک جنوبی افریقہ کے شہر کیپ ٹاؤن میں کھیلا جائے گا۔

ٹورنامنٹ میں شرکت کرنے والی ٹیم کے بہتر انتخاب کے لیے اتوار کو راشد لطیف کرکٹ اکیڈمی گراؤنڈ میں کراچی نائٹس اور کراچی کنگز کے درمیان میچ ہوگا۔

کراچی نائٹس کی کپتانی جعفر قریشی کریں گے جب کہ ٹیم میں ساجد علی، اظہر خان، اقبال شیخ، عاصم ممتاز، مظہر حسین، شاہد داؤد، عمران الحق، جواد علی، نعیم طیب، احمد حیات، عام سبزواری، محمد یوسف اور سہیل مہدی شرکت کریں گے۔

کراچی کنگز میں فواد بیری کپتان، ڈاکٹر اسجد، محمد جاوید، جام نفیس، قمر ابراہیم، آصف صدیقی، منصور خان، عرفان اللہ، خالد یاسین، وحید احمد، آصف مغل، شاکر بھگت اور احسن شکور شامل ہوں گے۔

اس ٹورنامنٹ میں 14 ٹیمیں شامل ہوں گی جب کہ 2020 میں ہونے والے ٹورنامنٹ میں 12 ٹیموں نے حصہ لیا تھا۔ آئندہ ٹورنامنٹ میں امریکہ اور متحدہ عرب امارات کی نئی ٹیمیں بھی شامل ہوں گی۔

ایونٹ کی افتتاحی تقریب 5 مارچ کو منعقد ہوگی جس کے بعد 6 مارچ سے میچز کا انعقاد ہوگا جب کہ 14 ٹیموں کو دو پولز میں تقسیم کیا گیا ہے۔

ہر ٹیم 6 سے 15 مارچ کے دوران پول میں موجود دیگر ٹیموں کے خلاف چھ راؤنڈ میچز کھیلے گی، ہر پول سے سرفہرست دو ٹیمیں سیمی فائنل میں پہنچے گی۔

پول اے میں میزبان جنوبی افریقہ، پاکستان، انگلینڈ، ویلز، بھارت، نمیبیا اور امریکہ شامل ہیں جب کہ پول بی میں دفاعی عالمی چیمپئن آسٹریلیا، نیوزی لینڈ، ویسٹ انڈیز، زمبابوے، کینیڈا، سری لنکا اور متحدہ عرب امارات کی ٹیمیں شامل ہیں۔