پی ایس ایل 8 میں شرکت کے لیے دنیائے کرکٹ کے بڑے کھلاڑیوں نے ہامی بھردی ہے۔

تفصیلات کے مطابق آسٹریلوی کپتان ایرن فنچ بھی پی ایس ایل 8 کا حصہ ہوں گے جب کہ نیوزی لینڈ کے جمی نیشم اور مارٹن گپٹل بھی پی ایس ایل 8 کھیلنے کے لیے تیار ہوگئے ہیں۔

علاوہ ازیں ویسٹ انڈیز کے کپتان نکولس پورن بھی پی ایس ایل میں ہوں گے جب کہ سری لنکن کرکٹر راجا پکشے نے بھی پی ایس ایل کھیلنے کی ہامی بھر دی ہے۔

یہ تمام کھلاڑی پی ایس ایل ایل سیزن 8 کی ڈرافٹ میں پلاٹینیم کیٹیگری کے لیے دستیاب ہوں گے۔

واضح رہے کہ دنیا بھر کے معروف کھلاڑی پاکستان سپر لیگ میں شرکت کے لیے غیر معمولی دلچسپی لے رہے ہیں جب کہ نامور کرکٹرز کا پاکستان سپر لیگ کے ڈرافٹ کے لیے رجسٹریشن کرانے کا سلسلہ بھی جاری ہے۔

اس سے قبل بنگلا دیش کے معروف آل راؤنڈر شکیب الحسن نے بھی پلئیرز ڈرافٹنگ کے لیے اپنی رجسٹریشن کرائی ہے جب کہ جنوبی افریقہ کے اسٹار کھلاڑی ڈیوڈ ملر اور سری لنکن کرکٹر وینندو ہسارانگا نے بھی پی ایس ایل کے لیے رجسٹریشن کروالی ہے۔

خیال رہے کہ پی ایس ایل 8 کا آغاز 15 فروری سے ہوگا جب کہ ڈرافٹنگ 18 سے 22 نومبر کے درمیان کروائے جانے کا امکان ہے۔

دوسری جانب پی ایس ایل 8 کے لیے پلیئر ڈرافٹنگ کو حتمی شکل دے دی گئی ہے جس کا فیصلہ قرعہ اندازی کے ذریعے کیا گیا ہے۔

یاد رہے کہ پی ایس ایل 8 کے لیے 17 میچز کا فیصلہ ایک خصوصی شماریاتی ٹول کے ذریعے کیا جائے گا۔