فیفا ورلڈ کپ میں ایک کے بعد ایک اپ سیٹ جاری ہیں جب کہ اب تک ہونے والے میچز کی بنیاد پر راؤنڈ آف 16 (پری کوارٹر فائنل) تک 14 ٹیموں نے رسائی حاصل کرلی ہے۔

قطر میں جاری فیفا ورلڈ کپ اپنے پہلے راؤنڈ کے اختتامی مراحل میں داخل ہوچکا ہے جب کہ پہلے راؤنڈ میں اب تک کہ ہونے والے میچز کی بنیاد پر 14 ٹیموں نے راؤنڈ آف 16 تک رسائی حاصل کی ہے۔

اسی کے ساتھ ہی فیفا ورلڈ کپ میں ایک کے بعد ایک اپ سیٹ جاری ہیں، جرمنی اور بیلجیئم جیسی بڑی ٹیمیں ورلڈ کپ سے باہر ہوگئی ہیں۔

راؤنڈ آف 16 میں پہنچنے والی ٹیموں میں کرسٹیانو رونالڈو کی پرتگال اور لیونل میسی کی ارجنٹینا بھی شامل ہیں۔

علاوی ازیں نیدرلینڈز، فرانس، انگلینڈ، برازیل، امریکہ، پولینڈ، آسٹریلیا، کروشیا، مراکش، سینیگال، اسپین اورجاپان نے بھی پری کوارٹر فائنل تک رسائی حاصل کی ہے۔

راؤنڈ آف 16 میں اب بھی مزید 2 ٹیموں نے کوالیفائی کرنا ہے جن کا فیصلہ کل ہونے والے میچز کے بعد ہوجائے گا۔

واضح رہے کہ فیفا ورلڈ کپ میں راؤنڈ آف 16 کے میچز کا آغاز بھی کل سے ہی ہوگا جس کا پہلا میچ نیدر لینڈز اور امریکہ کی ٹیموں کے درمیان کھیلا جائے گا جب کہ پری کوارٹر فائنل کے میچز 7 دسمبر تک جاری رہیں گے۔

راؤنڈ آف 16 کے بعد کوارٹر فائنل کا مرحلہ آئے گا جس میں 8 ٹیمیں کوالیفائی کریں گی جب کہ کوارٹر فائنل کے میچز 9 دسمبر سے 11 دسمبر کے دوران کھیلے جائیں گے۔

اسی طرح سیمی فائنل کے میچز 14 سے 17 دسمبر کے دوران ہوں گے جب کہ فٹ بال کے سب سے بڑے ایونٹ کا فائنل 18 دسمبر کو کھیلا جائے گا۔