آسٹریلیا کے لیجنڈری آف اسپنر نیتھن لیون نے ٹیسٹ کرکٹ میں  نیا سنگ میل عبور کرلیا۔

نیتھن لیون  ٹیسٹ کرکٹ میں سب سے زیادہ وکٹیں حاصل کرنے والوں  کی ٹاپ ٹین فہرست میں  جنوبی افریقہ کے ڈیل اسٹین کو پیچھے چھوڑتے ہوئے نویں نمبر پر آگئے۔

وہ سری لنکا کے متھیا مرلی دھرن، اپنے ہم وطن شین وارن، بھارت کے انیل کمبلے اور روی چندرن ایشون  کے بعد اس فہرست میں شامل ہونے والے پانچویں اسپنر ہیں۔

انہوں نے رواں برس یکم جولائی کو بھارت کے کپل دیو کی 434 وکٹوں کا ریکارڈ توڑتے ہوئے ٹاپ ٹین فہرست میں جگہ بنائی تھی۔

نیتھن لیون نے ویسٹ انڈیز کے خلاف پہلے ٹیسٹ میچ کی دوسری اننگ میں 2 وکٹیں  حاصل کرکے ڈیل اسٹین کی 439 وکٹوں کا ریکارڈ توڑ ڈالا۔

ان کی وکٹوں کی تعداد 440 ہوگئی  ہے اور وہ بھارت کے روی چندرن ایشون سے آٹھویں پوزیشن چھیننے سے صرف 2 وکٹوں کے فاصلے پر  موجود  ہیں۔

یاد رہے کہ  نیتھن لیون نے 2011 میں ٹیسٹ ڈیبیو سری لنکا کے خلاف گال میں کیا تھا۔

وہ 111 ٹیسٹ میچز میں 440 وکٹیں حاصل کرچکے ہیں جس میں 3 مرتبہ میچ میں 10 وکٹیں اور 20 مرتبہ اننگ میں 5 وکٹیں حاصل کرچکے ہیں۔

فرسٹ کلاس کرکٹ میں نیتھن لیون کی وکٹوں کی تعداد 674 ہے۔

واضح رہے کہ ٹیسٹ کرکٹ میں سب سے زیادہ 800 وکٹیں  سری لنکا کے مرلی دھرن نے حاصل کررکھی ہیں۔دوسرے نمبر پر 708 وکٹوں کے ساتھ آسٹریلیا  کے شین وارن موجود ہیں۔

تیسرے نمبر پر 667 وکٹوں کے ساتھ انگلینڈ کے جیمز اینڈرسن موجود ہیں، چوتھے نمبر پر 619 وکٹوں کے ساتھ بھارت کے انیل کمبلےاور پانچویں نمبر پر 566 وکٹوں کے ساتھ انگلینڈ کے اسٹورٹ براڈ موجود ہیں۔

چھٹے نمبر پر  563 وکٹوں کے ساتھ آسٹریلیا کے گلین میک گرا   ، ساتویں نمبر پر 519 وکٹوں کے ساتھ ویسٹ انڈیز کے کورٹنی والش ، آٹھویں نمبر پر 442 وکٹوں کے ساتھ بھارت کے روی چندرن ایشون ، نویں نمبر پر 440 وکٹوں کے ساتھ نیتھن لیون اور دسویں نمبر پر 439 وکٹوں کے ساتھ جنوبی افریقہ  کے ڈیل اسٹین موجود ہیں۔

اس فہرست میں سے جیمز اینڈرسن، اسٹورٹ براڈ،  روی چندرن ایشون اور نیتھن لیون کے علاوہ باقی تمام ریٹائر ہوچکے ہیں۔

The GOAT takes another step.

Next up: @ashwinravi99 😉#AUSvWI pic.twitter.com/I9FS7MDSjG

— cricket.com.au (@cricketcomau) December 2, 2022