پشاور: شائقین کرکٹ کے لیے ایک اور بری خبر سامنے آگئی ہے۔

تفصیلات کے مطابق خیبر پختونخوا میں کرکٹ گراؤنڈز کی بروقت تکمیل نہ ہونے کے باعث پی ایس ایل کے میچز اس بار بھی نہیں ہوسکیں گے۔

پشاور زلمی نے معاملات دیکھنے کے لیے پی سی بی مینجمنٹ کمیٹی کے چیئرمین نجم سیٹھی کو دورہ پشاور کی دعوت دے دی ہے۔

ڈائریکٹر پشاور زلمی محمد اکرم اور ڈائریکٹر جنرل اسپورٹس خیبر پختونخوا خالد خان نے پشاور میں پی ایس ایل میچز کرانے کے لئے بننے والے ارباب نیاز کرکٹ اسٹیڈیم اور حیات آباد کرکٹ اسٹیڈیم کا دورہ کیا اور تعمیراتی کام کا جائزہ لیا۔

ڈائریکٹر پشاور زلمی محمد اکرم کا کہنا تھا کہ اسٹیڈیم پر ابھی کام باقی ہے اس لیے اس سال بھی پی ایس ایل کے میچز پشاور میں ممکن نہیں۔

ڈی جی اسپورٹس خالد خان کہتے ہیں حیات آباد اسٹیڈیم جلد مکمل کیا جائے گا، ارباب نیاز اسٹیڈیم پر 85 فیصد کام مکمل ہوچکا ہے۔

انہوں نے کہا کہ راوں مالی سال ارباب نیاز کرکٹ اسٹیڈیم پر تعمیراتی کام مکمل کیا جائے گا، فنڈز کے حوالے سے مشکلات ہیں وفاقی حکومت کی جانب سے فنڈ ملنے پر کام تیز کیا جائے گا۔

واضح رہے کہ پشاور میں 2006ء کے بعد سے انٹرنیشنل میچز تاحال نہیں ہوسکے ہیں پشاور کے شائقین کرکٹ کئی سالوں سے پی ایس ایل کے میچز پشاور میں دیکھنے کے خواہش مند ہیں۔

پشاور میں میچز نہ ہونے کی نوید سنا کر ایک بار پھر شائقین کرکٹ کی امیدوں پر پانی پھیر دیا گیا ہے۔