نیوزی لینڈ کرکٹ نے دورہ پاکستان کے لیے ون ڈے اسکواڈ کا اعلان کردیا ہے جس کے کپتان کین ولیمسن ہوں گے۔

پاکستان اور نیوزی لینڈ کی ٹیموں کے درمیان 10 سے 14 جنوری تک کراچی میں ون ڈے سیریز شیڈول ہے جس کے لیے نیوزی لینڈ نے اسکواڈ کا اعلان کیا ہے۔

نیوزی لینڈ کرکٹ نے ورک لوڈ مینجمنٹ کے باعث دورہ پاکستان اور بھارت کے لیے الگ الگ اسکواڈ کا اعلان کیا ہے۔

نیوزی لینڈ کے دورہ پاکستان کے موقع پر ون ڈے اسکواڈ کی قیادت کین ولیمسن کریں گے جب کہ ون ڈے اسکواڈ کے کھلاڑی 4 جنوری کو کراچی پہنچیں گے۔

نیوزی لینڈ کے ون ڈے اسکواڈ میں آل راؤنڈر ہنلی شپلی کو پہلی بار اسکواڈ کا حصہ بنایا گیا ہے جب کہ ایش سوڈھی اور ہنری نکولس نے ون ڈے اسکواڈ میں واپسی کی ہے۔

علاوہ ازیں دیگر کھلاڑیوں میں ٹام لیتھم، ڈیون کونوے، فن ایلن، لوکی فرگوسن، مائیکل پرسویل، میٹ ہنری، ایڈم ملنے، گلین فلپس، ڈیرل مچل، مچل سینٹنر اور ٹم ساؤتھی شامل ہیں۔

گیری اسٹیڈ اور شین جرگینسن کو دورہ پاکستان کے لیے کوچز کی ذمہ داریاں سونپی گئی ہیں جب کہ لیوک رونچی دورہ بھارت میں کوچنگ اسٹاف کی قیادت کریں گے۔

واضح رہے کہ ون ڈے سیریز سے قبل نیوزی لینڈ کرکٹ ٹیم پاکستان میں دو ٹیسٹ میچز بھی کھیلے گی جس کے لیے پہلے ہی اسکواڈ کا اعلان کردیا گیا ہے۔

ٹیسٹ سیریز کے لیے نیوزی لینڈ کے کھلاڑی 22 دسمبر کو کراچی پہنچے گے جب کہ پہلا ٹیسٹ کراچی اور دوسرا ملتان میں کھیلا جائے گا۔

یاد رہے کہ ون ڈے سیریز کے تینوں میچز کراچی میں کھیلے جائیں گے، پہلا میچ 10 جنوری، دوسرا 12 جنوری اور تیسرا 14 جنوری کو کھیلا جائے گا۔