فیفا ورلڈکپ قطر کے دوسرے کوارٹر فائنل میں ارجنٹینا نے نیدر لینڈز کو شکست دے کر سیمی فائنل کے لیے کوالیفائی کرلیا۔

تفصیلات کے مطابق کھیل کے اختتام  تک مقابلہ 2-2 گول سے برابر رہنے کے بعد ارجنٹینا  نے پینلٹی اسٹروک پر 3-4 سے فتح حاصل کی۔

کھیل کے آغاز کے 35ویں منٹ میں ارجنٹینا   کے نیہول مولینا نے گول کرکے اپنی ٹیم کوبرتری دلوائی۔73ویں منٹ میں کپتان لیونل میسی نے پینلٹی اسٹروک پر گول کرکے ٹیم کی برتری 0-2 کردی۔

10 منٹ بعد نیدرلینڈز واؤٹ ویگھورسٹ نے گول کرکے ارجنٹینا کی برتری کم کردی۔

انجری ٹائم کے بالکل آخری مراحل میں جب آسان فتح ارجنٹینا سے صرف چند سیکنڈز  دور تھی ڈینزل ڈم فرائز نے  گول کرکے مقابلہ 2-2 گول سے برابر کردیا۔

بعد ازاں 30 منٹ کے ایکسٹرا ٹائم میں کوئی گول اسکور نہ ہوسکا اور میچ کا حتمی فیصلہ پینلٹی اسٹروکس پر ہوا جس میں ارجنٹینا نے 3-4 سے فتح حاصل کی۔

واضح رہے کہ اس سے قبل برازیل اور  کروشیا کے میچ  کا فیصلہ بھی پینلٹی اسٹروکس پر ہوا تھا جس میں کروشیا نے پانچ مرتبہ کی عالمی چیمپئن برازیل کو 2-4 سے شکست دی تھی۔

دونوں ٹیموں کے درمیان میچ بغیر کسی گول کے برابر رہا تھا۔

آج کوارٹر فائنل  مرحلے کے آخری دو میچز کھیلے جائیں گے ۔ تیسرے کوارٹر فائنل میں پرتگال اور مراکش جبکہ چوتھے کوارٹر فائنل میں انگلینڈ اور فرانس کی ٹیمیں مد مقابل آئیں گی۔

ارجنٹینا اور کروشیا پہلے سیمی فائنل میں 14 دسمبر بروز بدھ کو مد مقابل آئیں گے۔