کولمبیا سے تعلق رکھنے والے 22 سالہ فٹبالر ٹریننگ سیشن کے دوران گرنے کے بعد اس دنیا سے رخصت ہوگئے ہیں۔

غیر ملکی خبر رساں ادارے کے مطابق ارجنٹائن کے فرسٹ ڈویژن کلب کے عہدیداروں نے اعلان کیا کہ کولمبیا کے مڈفیلڈر اینڈریس بیلنٹا منگل کو ایٹلیٹیکو ٹکومن کےساتھ تربیتی سیشن کے دوران گرنے کے بعد چل بسے ہیں۔

22 سالہ کھلاڑی چھٹی کے وقفے کے بعد اپنی ٹیم کے ساتھ پہلی پریکٹس کررہے تھے کہ وہ اچانک گر پڑے جس کے بعد انہیں سان میگوئل ڈی ٹکومن کے ایک اسپتال منتقل کیا گیا۔

رپورٹ کے مطابق اسپتال کے عملے نے انہیں 40 منٹ تک بچانے کی کوشش کی لیکن وہ جانبر نہ ہوسکے اور اس دنیا سے رخصت ہوگئے۔

ایٹلیٹیکو ٹکومن کے افسر نے میڈیا سے بات کرتے ہوئے کہا کہ ’ہمیں آپ کو اینڈریس بیلنٹا کی موت کے بارے میں بتاتے ہوئے افسوس ہے۔ کلب کے سپورٹرز آج بہت غمزدہ ہیں۔ یقیناً ہم ان کے خاندان، ساتھیوں اور دوستوں کی حمایت کرتے رہیں گے‘۔

واضح رہے کہ اینڈریس بیلنٹا نے 2019 میں اپنے کیریئر کا آغاز کرنے کے بعد جولائی 2021 میں کولمبیا کے کلب ڈیپورٹیوے کیلی سے ایٹلیٹیکو میں شمولیت اختیار کی تھی۔

انہوں نے 2019 میں انڈونیشیا میں ہونے والے انڈر 20 ورلڈ کپ میں اپنی قومی ٹیم کی نمائندگی کی تھی۔

دوسری جانب کولمبیا کی فٹبال فیڈریشن نے بھی اینڈریس بیلنٹا کی موت پر افسوس کا اظہار کیا ہے۔