نیوزی لینڈ ٹیم کے ہیڈ کوچ گیری اسٹیڈ کا کہنا ہے کہ پاکستان کی ٹیم اچھی ہے لہذا سیریز چیلنجنگ ہوگی۔

نیوزی لینڈ ٹیم کے ہیڈ کوچ گیری اسٹیڈ کا میڈیا سے گفتگو کرتے ہوئے کہنا تھا کہ ہمارا سفر اچھا رہا اور پاکستان آکر اچھا لگ رہا ہے ۔

انہوں نے کہا کہ پاکستان کے ساتھ ہمیشہ سے اچھا مقابلہ ہوا ہے ، پاکستان کی ٹیم اچھی ہے لہذا سیریز چیلنجنگ ہوگی۔

ان کا کہنا تھا کہ اش سودھی کی ٹیسٹ ٹیم میں واپسی ہوئی ہے، سودھی نے اپنے بولنگ ایکشن میں تھوڑی تبدیلی کی ہے جب کہ ان کنڈیشنز میں لیگ اسپنر کا کردار اہم ہوگا۔

نیوزی لینڈ ٹیم کے ہیڈ کوچ کا کہنا تھا کہ انگلینڈ کی سیریز میں ابرار احمد نے جس طرح بولنگ کی ہم نے اس کو بھی دیکھا ہے ۔

انہوں نے بتایا کہ جمیسن انجری کی وجہ سے اسکواڈ کا حصہ نہیں ہیں جب کہ ٹرینٹ بولٹ بگ بیش کھیل رہے ہیں جس کی وجہ سے وہ اسکواڈ کا حصہ نہیں۔

گیری اسٹیڈ کہتے ہیں کہ ہمارے پاس جو بولر ہیں ان پر ہی اعتماد کر رہے ہیں، پاکستان انگلینڈ سے ہارا ہے لیکن ہم پاکستان کی ٹیم کو آسان نہیں لیں گے۔

پاکستان ٹیم اپنی کنڈیشنز میں اچھا کرنے کی صلاحیٹ رکھتی ہے، کین ولیمسن نے کافی عرصے ٹیم کی کپتانی کی جب کہ ساؤتھی ٹیم کو نٸی سمت میں لے کر جائیں گے۔

انہوں نے مزید کہا کہ میک کولم نے ٹیسٹ کرکٹ کو نٸی جدت دی ہے، ہوسکتا ہے دوسری ٹیمیں بھی اس ٹرینڈ کو اپنائیں۔

واضح رہے کہ نیوزی لینڈ ٹیم پاکستان سے کراچی میں بتیس سال بعد میچ کھیلنے جارہی ہے جب کہ آخری مرتبہ پاکستان اور نیوزی لینڈ کا میچ اکتوبر 1990 میں ہوا تھا۔

جاوید میانداد کی کپتانی میں پاکستان نے اس میچ میں فتح حاصل کی تھی جب کہ اس دوران نیوزی لینڈ اور پاکستان کے درمیان نیشنل اسٹیڈیم کراچی میں چھ میچ کھیلے گے تھے جس میں تین میچ میں پاکستان نے فتح حاصل کی تھی اور تین میچ ڈرا ہوئے۔