ملتان میں 16 سال بعد ٹیسٹ کرکٹ کی واپسی کے پیشِ نظر سیکیورٹی انتظامات انتہائی سخت کر دیے گئے ہیں۔

ملتان ٹیسٹ میں میچ دیکھنے آنے والے شائقین کی بائیو میٹرک تصدیق کی جائے گی جب کہ میچ کے دن فاطمہ جناح کالونی پارکنگ میں نادرا کے کاؤنٹر بنانے کا فیصلہ کیا گیا ہے۔

ذرائع کا کہنا ہے کہ شائقین کی شناخت نادرا کی مدد سے کی جائے گی، ضلعی انتظامیہ نے پارکنگ میں کاؤنٹر بنانے کے لیے نادرا کو درخواست بھی دے دی ہے۔

واضح رہے کہ پاکستان اور انگلینڈ کی ٹیموں کے درمیان ٹیسٹ سیریز جاری ہے جس کا دوسرا ٹیسٹ ملتان کرکٹ اسٹیڈیم میں کھیلا جائے گا۔

ملتان ٹیسٹ کا آغاز 9 دسمبر سے ہوگا جو 13 دسمبر تک جاری رہے جب کہ اس سے قبل دونوں ٹیموں کے درمیان پہلا ٹیسٹ راولپنڈی کرکٹ اسٹیڈیم میں کھیلا گیا تھا۔

پنڈی ٹیسٹ میں انگلینڈ نے ٹاس جیت کر بیٹنگ کا فیصلہ کیا اور پہلی اننگز میں 657 رنز کا پہاڑ کردیا جس کے بوجھ تلے پاکستان ٹیم ناکام ہوگئی۔

پہلی اننگز میں قومی ٹیم 579 رنز پر ڈھیر ہوگئی جس کے بعد انگلینڈ نے دوسری اننگز میں 264 رنز 7 کھلاڑی آؤٹ پر اپنی اننگز ڈکلیئر کی اور پاکستان کو جیت کے لیے 343 رنز کا ہدف دیا۔

ہدف کے تعاقب میں قومی ٹیم کے بلے باز ناکام دکھائی دیے اور صرف 268 پر ہی پویلین لوٹ گئے، اس طرح انگلینڈ نے پہلا ٹیسٹ 74 رنز سے اپنے نام کیا تھا۔