پاکستان کرکٹ بورڈ (پی سی بی) نے قومی ٹیم کا کوچنگ اسٹاف بدلنے کا فیصلہ کرلیا ہے۔

کرکٹ بورڈ مینجمنٹ کمیٹی کے چیئرمین نجم سیٹھی کا کہنا ہے کہ ہیڈ کوچ ثقلین مشتاق سمیت کوچنگ اسٹاف کی آخری اسائمنٹ کا فیصلہ کل ہوگا۔

انہوں نے کہا کہ پاکستان ٹیم کی کوچنگ کے لیے اسٹارز کی بجائے کوالیفائڈ کوچز کی ضرورت ہے، ہمیں اپنے سابق کرکٹرز اور اسٹارز کی قدر ہے مگر پاکستان ٹیم کا کوچنگ اسٹاف غیر ملکی رکھنے کا فیصلہ کیا ہے۔

نجم سیٹھی کا کہنا تھا کہ قومی ٹیم کی سلیکشن کمیٹی کا اعلان بھی کل ہوگا جب کہ موجودہ سلیکشن کمیٹیاں اور کرکٹ ایسوسی ایشنز تحلیل کردی گئیں ہیں۔

کرکٹ بورڈ مینجمنٹ کمیٹی کے چیئرمین کہتے ہیں لوکل ایسوسی ایشنز کے غیر ملکی کوچز کا فیصلہ کل کریں گے جب کہ کوچنگ سے فارغ ہونے والے سابق قومی کرکٹرز کو کہیں اور نوکریاں دی جائیں گی۔

ان کا کہنا تھا کہ پاکستان کپ کو جاری رکھنے کا فیصلہ ہوا ہے، جونیئر لیگ اور ویمنز لیگ کے مستقبل پر مشاورت کے بعد آگاہ کریں گے۔

نجم سیٹھی کہتے ہیں میں خواتین کو اسپورٹس میں آگے لانے کے سب سے زیادہ حق میں ہوں، پاکستان کرکٹ بورڈ کے دفتر میں آڈٹ اور غلط پیسوں کے استعمال کیلئے تعیناتی کا سوچ رہے ہیں۔

مزید پڑھیں: نجم سیٹھی نیوزی لینڈ کے خلاف ٹیسٹ اسکواڈ کے اعلان سے ناخوش

انہوں نے واضح کیا کہ قومی ٹیم کی سلیکشن میں میرا کوئی کردار نہیں ہوگا۔

واضح رہے کہ پاکستان کرکٹ بورڈ کے چیف سلیکٹر محمد وسیم کو عہدے سے فارغ کردیا گیا ہے جب کہ انہیں بذریعہ ای میل آگاہ کردیا گیا ہے۔

دوسری جانب پی سی بی کی گورننگ باڈی کو بھی تحلیل کردیا گیا ہے، ڈومیسٹک کرکٹ کے سربراہ ندیم خان کو بھی ان کے عہدے سے فارغ  کیے جانے کا امکان ہے۔