سابق کپتان شاہد آفریدی کا کہنا ہے کہ پاکستان ٹیم نے انگلینڈ کے خلاف پرانے طرز کی کرکٹ کھیلی جو ان کی شکست کی وجہ بنی۔

پاکستان کرکٹ ٹیم کے سابق کپتان شاہد خان آفریدی کا کہنا ہے کہ انگلینڈ سے مقابلے کے لیے دیگر ممالک کی ٹیموں نے اپنی کرکٹ کا انداز اپنایا جس کو پاکستان اپنانے میں ناکام رہا۔

شاہد آفریدی کا کہنا تھا کہ پاکستان کرکٹ بورڈ گراس روٹ لیول پر کام کرنے کا ذمہ دار ہے کیونکہ اس سے قابل کھلاڑیوں کی تیاری میں مدد ملے گی۔

سابق کپتان کہتے ہیں گراس روٹ لیول سے ہی مہارتیں سامنے آئیں گی جس سے پاکستان کو اس طرح کے حالات سے بچنے میں مدد ملے گی۔

علاوہ ازیں انہوں نے پی سی بی کو ہر چند سال بعد اپنی پالیسیاں تبدیل کرنے پر بھی تنقید کا نشانہ بنایا۔

انہوں نے کہا کہ بابر اعظم کو تاریخی شکست کا ذمہ دار ٹھہرانا ناانصافی ہے۔ ٹیم میں زخمی کھلاڑیوں کی وجہ سے پاکستان کے لیے تین حقیقی بولروں کے ساتھ اگلش ٹیم کو دو بار آؤٹ کرنا ناممکن ہوگیا تھا۔

شاہد آفریدی نے سوال اٹھایا کہ شاہ نواز دھانی اور محمد حسین کہا ہیں؟ ان کھلاڑیوں نے ٹیم کے ساتھ آسٹریلیا کا دورہ کیا تھا لیکن ٹیم میں انجرڈ بولروں کے باوجود بھی انہیں اچانک ہی سیریز سے باہر کردیا گیا۔

سابق کپتان نے ٹیم کو مشورہ دیا کہ وہ نیوزی لینڈ کے خلاف آئندہ سیریز کے لیے اپنے تجربے سے سبق سیکھیں اور حقیقی بولروں سے شروعات کریں۔

انہوں نے شائقین پر بھی زور دیا کہ وہ نیوزی لینڈ کے خلاف آئندہ سیریز میں ٹیم کی حمایت جاری رکھیں کیونکہ ہوم وائٹ واش کے بعد کھلاڑیوں کو عوام کی حمایت کی ضرورت ہے۔