پاک بھارت ٹیسٹ میچ  کے لیے ایم سی سی حکام اور وکٹورین حکومت نے کرکٹ آسٹریلیا سے رابطہ کیا ہے۔

تفصیلات کے مطابق میلبرن کرکٹ  کلب (ایم سی  سی) کے چیف ایگزیکٹو اسٹیورٹ فوکس نے ریڈیو کمنٹری کے دوران یہ انکشاف کیا کہ پاکستان اور بھارت کے درمیان ٹیسٹ میچ  کے آسٹریلیا میں انعقاد کے لیے ایم سی سی اور وکٹورین حکومت نے باضابطہ طور پر کرکٹ آسٹریلیا سے رابطہ کرلیا ہے۔

اسٹیورٹ فوکس نے آسٹریلیا اور جنوبی افریقہ ٹیسٹ میچ کے چوتھے روز کمنٹری کے دوران کرکٹ آسٹریلیا سے رابطوں کا بتایا۔ انہوں نے کہا کہ اکتوبر میں پاک بھارت ٹی ٹوئنٹی ورلڈکپ میچ کے کامیاب انعقاد کے بعد کرکٹ آسٹریلیا سے رابطہ کیا۔

مزید پڑھیں: ٹی ٹوئنٹی ورلڈکپ؛ پاک بھارت میچ میں کتنے شائقین نے شرکت کی؟

چیف ایگزیکٹو ایم سی سی کا کہنا تھا کہ ہمیں پاکستان اور بھارت کے میچ کی میزبانی کر کے اچھا لگے گا۔ ٹی ٹوئنٹی ورلڈکپ میں پاکستان اور بھارت کا ایم سی جی میں میچ 90 ہزار 293 تماشائیوں نے دیکھا۔

انہوں نے کہا کہ  لگاتار تین ٹیسٹ میچ ایم سی جی میں  شاندار ہوں گے ۔روزانہ اسٹیڈیم تماشائیوں سے بھرا ہو گا، ہم نے اس حوالے سے پوچھا ہے۔ معاملہ بہت پیچیدہ ہے لیکن ہم نے اور وکٹوریہ حکومت نے کرکٹ آسٹریلیا سے بات کی ہے، مصروف ترین شیڈول سب سے بڑا چیلنج ہو گا۔

اسٹیورٹ فوکس کا کہنا تھا کہ امید ہے کہ کرکٹ آسٹریلیا اس حوالے سے آئی سی سی سے  بات کرے گا اور کوششیں جاری رکھے گا۔ میں سمجھتا ہوں کہ ہاؤس فل میں کھیل کے جشن کے لیے شاندار ماحول ہو گا۔

مزید پڑھیں: بھارتی کرکٹ بورڈ نے پاک بھارت ٹیسٹ سیریز کا امکان بھی مسترد کردیا

انہوں نے کہا کہ آئندہ برس پاکستان کا دورہ آسٹریلیا فیوچر ٹور پروگرام کا حصہ ہے۔ آئندہ برس ایم سی جی میں باکسنگ ڈے ٹیسٹ پاکستان اور آسٹریلیا کے درمیان ہو گا۔ باکسنگ ڈے ٹیسٹ کے لیے پاکستانی کمیونٹی سے رابطہ کریں گے۔

دوسری جانب ترجمان کرکٹ آسٹریلیا کا کہنا ہے کہ نیوٹرل وینیو پر ٹیسٹ سیریز یا ایک ٹیسٹ میچ کھیلنا پاکستان اور بھارت کے بورڈز کے ہاتھ میں ہے۔ اگر دونوں بورڈز کے درمیان کوئی معاہدہ ہوتا ہے تو کرکٹ آسٹریلیا کو میزبانی میں دلچسپی ہو گی۔

ترجمان کرکٹ آسٹریلیا کا کہنا ہے کہ رضامندی دونوں بورڈز نے ظاہرکرنا ہے۔ دونوں ٹیموں کے سپورٹرز کی ایک بڑی تعداد آسٹریلیا میں موجود ہے۔

واضح رہے کہ میلبرن کرکٹ کلب (ایم سی سی ) میلبر کرکٹ گراؤنڈ (ایم سی جی) کے تمام انتظامات سنبھالتا ہے۔

پاکستان اور بھارت کے درمیان آخری ٹیسٹ میچ 2007 میں ہوا تھا جبکہ  پاکستان اور بھارت نے 2013 کے بعد سے کوئی باہمی سیریز نہیں کھیلی۔

دونوں  ٹیمیں صرف آئی سی سی میگا ایونٹس میں مد مقابل آتی ہیں۔