سربراہ پی سی بی مینجمنٹ کمیٹی نجم سیٹھی نیوزی لینڈ کے خلاف ٹیسٹ اسکواڈ کے اعلان سے ناخوش ہیں۔

سربراہ پی سی بی مینجمنٹ کمیٹی نجم سیٹھی پی سی بی ہیڈ کوارٹر قذافی اسٹیڈیم پہنچے، جہاں انہوں نے میڈٰیا سے گفتگو کی۔

اس موقع پر ان کے ہمراہ بورڈ آف گورننگ ممبر شکیل شیخ اور نعمان بٹ بھی شامل تھے جب کہ قذافی اسٹیڈیم کے باہر موجود حامیوں نے نجم سیٹھی کا استقبال کیا اور انہیں ہار پہناکر پھول نچھاور کیے۔

سربراہ پی سی بی مینجمنٹ کمیٹی نجم سیٹھی کا میڈیا سے گفتگو کرتے ہوئے کہنا تھا کہ پشاور سمیت کوئی علاقہ بھی ریڈ فلیگ نہیں ہے، جب انٹرنیشنل کرکٹ بحال ہورہی تھی تب لوگ کہتے تھے کراچی میں کرکٹ نہیں ہوگی۔

انہوں نے کہا کہ پشاور میں 6 ماہ میں انٹرنیشنل کرکٹ بحال ہوگی، عمران خان کے آنے کے بعد بھی کہنے والوں نے کہا تھا آپ کہیں نہیں جا رہے لیکن اس وقت پیٹرن کا فیصلہ تھا تو میں چپ چاپ چلا گیا۔

ان کا کہنا تھا کہ کمیٹی بنادی گئی ہے، چار ماہ میں گراؤنڈ لیول پر کام کریں گے اور دیکھیں گے کہ کیا تبدیلیاں کرنی ہیں۔

نیوزی لینڈ کے خلاف سیریز پر گفتگو کرتے ہوئے انہوں نے کہا کہ اچھا ہوتا نیوزی لینڈ کے خلاف قومی ٹیم کا اعلان نہ کیا جاتا، ٹیم کا اعلان نا کیا جاتا تو نئے آئیڈیاز لے کر آتے۔

نجم سیٹھی کہتے ہیں نیوزی لینڈ کی ٹیم کا دورہ پاکستان کافی اہم ہے، ابھی کراچی جاکر صورتحال کو دیکھیں گے اور کرکٹ کمیٹی کے چند اراکین نیوزی لینڈ سیریز کے انتظامات دیکھنے فوری کراچی جائیں گے۔

جو ٹیم نیوزی لینڈ کے خلاف سلیکٹ ہوئی اس میں ابھی تبدیلی کا دیکھیں گے، ڈومیسٹک کرکٹ میں ریجن اور ڈیپارٹمنٹ کرکٹ بحال کی جائے گی۔

پی سی بی مینجمنٹ کمیٹی کے سربراہ کا کہنا تھا کہ ڈومیسٹک کرکٹ کو بہتر کرنا سب سے اولین ترجیح ہے، ابھی ہماری کمیٹی کی پہلی میٹنگ ہونے جارہی ہے۔

انہوں نے مزید کہا کہ بھارت کے ساتھ سیریز کا جہاں بھی معاملہ آتا ہے تو حکومت کی مرضی ضروری ہوتی ہے۔