کراچی ٹیسٹ میں ناقص کپتانی پر سابق انگلش کپتان ناصر حسین نے بابر اعظم کو کڑی تنقید کا نشانہ بنایا ہے۔

سابق انگلش کپتان ناصر حسین کا غیر ملکی اسپورٹس چینل سے گفتگو کرتے ہوئے کہنا تھا کہ ’میرے خیال میں ہوم سائیڈ کا ایک مربوط منصوبہ تھا لیکن بابر اعظم صرف پلان اے کے ساتھ گئے‘۔

انہوں نے کہا کہ ’بابر اعظم کا پلان ایک ہی تھا کہ پچ اسپن کرے گی لہذا نعمان علی اور ابرار احمد دو اہم بولر ہوں گے جو مخالف ٹیم کو آؤٹ کریں گے لیکن جب پچ زیادہ اسپن نہیں ہوئی تو ان کے پاس کوئی دوسرا پلان ہی نہیں تھا‘۔

ان کا کہنا تھا کہ بابر اعظم نے سلمان علی آغا سے بولنگ ہی نہیں کروائی، پاکستانی کپتان قدامت پسند دکھائی دیتے ہیں اور انہوں نے کھیل کے نازک اوقات میں بھی ایک ہی حکمت عملی استعمال کی۔

ناصر حسین کہتے ہیں بابر اعظم اس سطح پر وکٹیں لینے والے بولروں کو استعمال نہیں کرتے تھے جب کہ انگلینڈ کے کپتان بین اسٹوکس ہر وقت آؤٹ آف دی باکس سوچتے ہیں۔

بین اسٹوکس کی تعریف کرتے ہوئے انہوں نے مزید کہا کہ ’اگر انہیں محسوس ہوتا کہ فلاں بولر انہیں وکٹ دلواسکتا ہے تو وہ اپنی چھٹی حس کا استعمال کرتے ہوئے اسے گیند تھمادیتے۔

واضح رہے کہ پاکستان اور انگلینڈ کی ٹیموں کے درمیان 3 ٹیسٹ پر مشتمل سیریز کھیلی گئی جس میں پاکستان کو عبرتناک وائش واش کا سامنا کرنا پڑا ہے۔

انگلینڈ نے راولپنڈی اور ملتان کے بعد کراچی ٹیسٹ بھی جیت لیا ہے جب کہ انگلینڈ نے تیسرا ٹیسٹ کھیل کے چوتھے دن پہلے سیشن میں ہی ختم کردیا۔