آئی سی سی ٹیسٹ رینکنگ میں قومی کرکٹ ٹیم کے کپتان بابر اعظم کی تنزلی ہوئی ہے جبکہ شاہین  آفریدی کی پوزیشن برقرار ہے۔

انٹرنیشنل کرکٹ کونسل (آئی سی سی) نے نئی ٹیسٹ پلیئرز رینکنگ جاری کردی جس کے مطابق بابر اعظم ایک درجہ تنزلی سے دوسری سے تیسری پوزیشن پر چلے گئے۔

آسٹریلیا کے مارنس لبوشین کی پہلی پوزیشن برقرار ہے جبکہ آسٹریلیا کے اسٹیو اسمتھ ایک درجہ ترقی سے دوسرے نمبر پر آگئے۔

مزید پڑھیں: کراچی ٹیسٹ: دوسرے روز کا پہلا سیشن نیوزی لینڈ کے نام

آسٹریلیا کے ٹریوس ہیڈ کا رینکنگ میں چوتھا نمبر برقرار ہے جبکہ  نیوزی لینڈ کے کین ولیمسن دو درجے ترقی کے بعد پانچویں نمبر پر آگئے۔

آسٹریلیا کے ڈیوڈ وارنر 17 درجے ترقی سے 14 ویں اور پاکستان کے امام الحق تین درجے ترقی سے 34 ویں نمبر پر آگئے جبکہ پاکستان کے عبداللہ شفیق رینکنگ میں 11 درجے تنزلی  سے 37 ویں نمبر پر چلے گئے۔

بولنگ کی فہرست میں آسٹریلیا کے پیٹ کمنز کی پہلی اور انگلینڈ کے جیمز اینڈرسن کی دوسری  پوزیشن برقرار ہے۔

مزید پڑھیں: شاہد آفریدی نے ٹی ٹوئنٹی سلیکشن کے لیے نیا معیار مقرر کردیا

 بھارت  کے جسپریت بمراہ، روی چندرن ایشون اور انگلینڈ کے اولی روبنسن ایک ایک درجہ ترقی سے بالترتیب تیسری سے پانچویں پوزیشن پر آگئے۔

جنوبی افریقہ کے کگیسو ربادا رینکنگ میں تین درجے تنزلی سے چھٹے نمبر پر چلے گئے جبکہ پاکستان کے شاہین آفریدی کی چھٹی پوزیشن برقرار ہے۔

پاکستان کے ابرار احمد رینکنگ میں تین درجے بہتری سے 60 ویں نمبر پر آگئے۔