پاکستان کرکٹ بورڈ (پی سی بی) کے سابق چیئرمین رمیز راجہ نے پاکستانی ٹیم کو بھارتی ٹیم سے سیکھنے کا مشورہ دیا ہے۔

بھارتی ٹیم نے ہفتے کے روز نیوزی لینڈ کو دوسرے ون ڈے میں آٹھ وکٹوں سے شکست دے کر تین میچوں کی سیریز میں ناقابل شکست برتری حاصل کرلی ہے۔

رائے پور میں کھیلے گئے میچ میں بھارت نے پہلے بولنگ کرنے کا فیصلہ کیا اور نیوزی لینڈ کو 108 رنز پر ہی ڈھیر کردیا جب کہ بھارتی فاسٹ بولر محمد شامی نے بلیک کیپس کے 3 شکار کیے۔

جواب میں بھارتی کپتان روہت شرما نے 51 رن کی ناقابل شکست اننگز کھیلی جب کہ بھارت نے مقررہ ہدف 20.1 اوور میں ہی پورا کرکے جیت اپنے نام کی۔

اپنے یوٹیوب چینل پر بات کرتے ہوئے رمیز راجہ نے کہا کہ بابر اعظم اینڈ کمپنی کو بھارت کی کتاب سے ایک پتا نکالنا چاہیے اور اپنے ملک میں اپوزیشن پر حاوی ہونے کی کوشش کرنی چاہیے۔

انہوں نے کہا کہ بھارت میں بھارتی ٹیم کو ہرانا مشکل ہے، یہی پاکستان سمیت دیگر برصغیر کی ٹیموں کو سیکھنے کی ضرورت ہے۔

ان کا کہنا تھا کہ ’’پاکستان کے پاس کافی صلاحیت ہے لیکن نتائج یا سیریز جیتنے کے معاملے میں ہماری کارکردگی بھارتی ٹیم کی طرح مستقل نہیں۔ ورلڈ کپ کے سال میں بھارتی ٹیم کے لیے یہ ایک اہم سنگ میل ہے‘‘۔

واضح رہے کہ بھارت 2023 میں ون ڈے ورلڈ کپ کی میزبانی کرنے جارہا ہے جب کہ انہوں نے حال ہی میں ویسٹ انڈیز، آسٹریلیا، انگلینڈ، جنوبی افریقہ، سری لنکا، اور نیوزی لینڈ کے خلاف اپنے ہوم ون ڈے سیریز میں فتوحات حاصل کی ہیں۔

اگر پاکستان کی بات کریں تو قومی ٹیم نے سال 2022 میں ہوم گراؤنڈ پر ٹیسٹ میں مسلسل شکست کے بعد کیویز کے ہاتھوں ون ڈے سیریز میں بھی 1-2 سے ناکامی حاصل کی ہے۔