سابق چیئرمین پی سی بی رمیز راجہ کا کہنا ہے کہ میں تعلیم کی وجہ سے فکسنگ کی لعنت سے بچا رہا۔

تفصیلات کے مطابق لاہور کی جی سی یونیورسٹی میں طلبہ سے خطاب کرتے ہوئے رمیز راجہ کا کہنا تھا کہ ماضی میں پاکستان کرکٹ میں فکسنگ کی بھیانک رات آئی تھی لیکن میں  اس لعنت سے بچا رہا جس کی بڑی وجہ تعلیم ہے۔

رمیز راجہ نے کہا کہ پاکستان میں بدقسمتی سے تسلسل کو نہیں چلنے دیا جاتا۔ اسپورٹس میں آگے بڑھنے کا اچانک سلسلہ ختم کرنے سے نقصان ہو رہا ہے۔

مزید  پڑھیں: سابق چیئرمین رمیز راجہ کے بول نیوز کو انٹرویو پر پی سی بی کا ردعمل

انہوں نے کہا کہ میں یہاں اپنا کیس لڑنے نہیں آیا مگر جو ہوا وہ اچھا نہیں ہوا۔ یہاں پچھلے دروازوں سے جگہ بنانے کا کلچر پورے ملک میں آیا ہوا ہے۔ آئین کو توڑ کر یہاں ایک بندے کو نوازنے کے لیے شب خون مارا گیا۔

سابق چیئر مین پی سی بی کا کہنا تھا کہ  تسلسل ٹوٹنے کے باوجود بابر اعظم کی ٹیم لڑکھڑاتی نہیں ہے اور یہ  بابر اعظم اور اس کی ٹیم نے میدان میں کھڑے ہوکر ثابت کیا۔

مزید پڑھیں: پاکستان جونیئر لیگ کو انتقامی سیاست کا نشانہ بنایا گیا، رمیز راجہ

رمیز راجہ نے کہا کہ  پاکستان نے فرسٹ ورلڈ کی ٹیموں کو آنکھیں دکھا کر ہرایا ہوا ہے۔

انہوں نے کہا کہ  لوگ سوشل میڈیا پر جھوٹی باتیں کرکے عزت اچھالنے میں لگے ہوئے ہیں۔ نوجوانوں کو موبائل چھوڑ کر میدان آباد کرنے چاہیئں۔

سابق چیئرمین پی سی بی نے کہا کہ  طالبات کو ویمن کرکٹ کو فروغ دینا چاہیئے کیونکہ پاکستان ویمن ٹیم اچھا کر رہی ہے۔