پاکستان کے سابق فاسٹ بولر عاقب جاوید کا کہنا ہے کہ ون ڈے ورلڈ کپ میں  بھارتی ٹریکس بابر الیون کو پریشان نہیں کرے گی۔

تفصیلات کے مطابق ایک نجی ٹی وی اسپورٹس چینل نے عاقب جاوید کے حوالے سے خبر دی ہے کہ آئی سی سی ون ڈے ورلڈ کپ میں پاکستان کو بھارتی پچز پر جدوجہد نہیں کرنا پڑے گی۔

عاقب جاوید کا کہنا ہے کہ پاکستان نے ہمیشہ بھارت کو ورلڈ کپ میں مشکل وقت دیا ہے۔ جب پاکستان ورلڈ کپ کے لیے بھارت جائے گا تو اسے وہاں کی پچوں پر کھیلنے میں کسی قسم کی پریشانی کا سامنا نہیں کرنا پڑے گا۔

پاکستانی پیس بیٹری کے حوالے سے عاقب جاوید کا کہنا تھا کہ پاکستان کی بولنگ نیوزی لینڈ کی باؤلنگ جیسی نہیں ہے، جہاں بھارتی بلے باز آکر 400 رنز بنالیں۔ اس بولنگ لائن اپ کے خلاف دباؤ کے حالات میں 300 کا اسکور کرنا بھارت کے لیے مشکل ہوگا.

پاکستان کے لیے 1992 میں ورلڈ کپ جیتنے والی ٹیم کے رکن نے پاکستان کرکٹ بورڈ  کو مشورہ دیا کہ وہ جلد از جلد شو پیس ایونٹ کے لیے اسکواڈ کو حتمی شکل دے اور ان کی ترتیب اور کمبی نیشن کو درست کر لیں تاکہ کھلاڑی اچھی طرح تیار ہو سکیں۔

انہوں نے مزید کہا کہ پاکستان اپنے بہترین بولنگ اٹیک کی وجہ سے دیگر ٹیموں پر برتری حاصل کرے گا۔

عاقب جاوید کے مطابق پاکستان کرکٹ ٹیم ون ڈے میں بہتر ہے کیونکہ اسے بولنگ کی وجہ سے فائدہ ہے۔ شاہین شاہ آفریدی، حارث رؤف اور نسیم شاہ اگر مکمل فٹ ہیں تو ٹیم کو فائدہ ہوگا۔ ان میں شاداب خان اور محمد نواز بھی ہیں۔