پی ایس ایل 8 کے ساتھ پاکستان ویمنز لیگ کے دو نمائشی میچز کروانے کا فیصلہ کرلیا گیا۔

پاکستان کرکٹ بورڈ (پی سی بی) کے ذرائع کے مطابق ویمنز لیگ کے دو نمائشی میچز کے لیے دو ٹیمیں تشکیل دی  جائیں گی۔

ذرائع کا کہنا ہے کہ دونوں ٹیموں میں قومی ویمنز ٹیم، قومی انڈر نائنٹین کرکٹرز اور غیر ملکی کرکٹرز شامل کی  جائیں گی۔ نمائشی میچز کی تاریخوں کا اعلان پی سی بی مینجمنٹ کمیٹی جلد  کرے گی۔

مزید پڑھیں: پی سی بی کا پی ایس ایل طرز کی ویمنز لیگ کا اعلان

ذرائع کا مزید کہنا ہے کہ پاکستان ویمنز لیگ کا افتتاحی ایڈیشن اب مارچ کے بجائے  ستمبر میں ہوگا۔ مارچ میں ویمنز آئی پی ایل کی وجہ سے پروڈکشن ٹیم اور درجہ اول کی ویمنز کرکٹرز کی دستیابی مشکل ہوگی۔

پی سی بی ذرائع کا کہنا ہے کہ ستمبر میں پاکستان میں ویمنز لیگ کو اچھے انداز میں کرایا جاسکتا ہے۔ ویمنز لیگ میں پی ایس ایل فرنچائز مالکان نے بھی دلچسپی ظاہر کی ہے۔

مزید پڑھیں: پی ایس ایل 8 کے دوران پاکستان ویمنز لیگ کیلئے آزمائشی میچز کرانے کا منصوبہ

ذرائع کا کہنا ہے کہ سابق چیئرمین پی سی بی رمیز راجا کے دور میں پروڈکشن اور لوجسٹکس اخراجات بچانے کے لیے پی ایس ایل کے ساتھ لیگ کرانے کا فیصلہ کیا گیا تھا۔

پی سی بی ذرائع کا مزید کہنا ہے کہ پی سی بی مینجمنٹ کمیٹی نے لیگ کا موجودہ نام ’دی ویمنز لیگ‘ تبدیل کرنے کا بھی فیصلہ کر رکھا ہے جبکہ  ویمنز لیگ کے لیے ابتدائی طور پر چار ٹیمیں بنانے کے فیصلے پر بھی نظرثانی ہوگی۔