ملتان: پاکستان سپر لیگ سیزن 8 کا میلہ آج سے ملتان میں سجنے جارہا ہے جس کے لیے غیر ملکی کھلاڑی بھی ملتان پہنچ رہے ہیں۔

پاکستان سپر لیگ (پی ایس ایل) سیزن 8 کا آغاز آج سے ملتان اسٹیڈیم میں ہونے جارہا ہے جس کا افتتاحی میچ ملتان سلطانز اور دفاعی چیمپئن لاہور قلندرز کے درمیان کھیلا جائے گا۔

میچ سے قبل ملتان اسٹیڈیم میں افتتاحی تقریب منعقد کی جائے جس میں پاکستان کے نامور ستارے اپنے فن کا مظاہرہ پیش کریں گے جن میں گلوکار عاصم اظہر، آئمہ بیگ، شائے گل، ساحر علی بگا اور فارس شامل ہیں۔

افتتاحی تقریب کا آغازشام 6 بجے شروع ہوگا، شائقین  کرکٹ کے لیے ملتان کرکٹ اسٹیڈیم کے گیٹس دوپہر 2 بجے کھول دیے جائیں گے۔

پی ایس ایل میں شرکت کے لیے غیر ملکی کھلاڑیوں کی ملتان آمد کا سلسلہ بھی جاری ہے، دفاعی چیمپئن لاہور قلندرز کے ڈیوڈ ویسا، لیام ڈاؤسن، سکندر رضا اور شائے ہوپ نے اسکواڈ کو جوائن کرلیا ہے۔

لاہور قلندرز نے شائے ہوپ کی خدمات حاصل کی ہیں جب کہ شائے ہوپ کو کوشال مینڈس کے متبادل کے طور پر منتخب کیا گیا ہے، کوشال مینڈس کو جارڈن کوکس کی جگہ پہلے تین میچز کے لیے منتخب کیا گیا تھا۔

لاہور قلندرز کے سی او او اور ٹیم منیجر ثمین رانا نے غیرملکی کھلاڑیوں کا استقبال کیا جب کہ فاسٹ بولر حارث رؤف نے بھی ٖغیر ملکی کھلاڑیوں کو ٹیم ہوٹل میں خوش آمدید کیا۔

دوسری جانب ویسٹ انڈیز کے آل راؤنڈر کیرن پولارڈ بھی ملتان پہنچ گئے ہیں، انہوں نے نجی ہوٹل میں ملتان سلطان کے اسکواڈ کو جوائن کیا۔ کیرن پولارڈ آج پی ایس ایل کا افتتاحی میچ کھیلیں گے۔

واضح رہے کہ پی ایس ایل کی فول پروف سیکیورٹی کے لیے وفاقی کابینہ نے فوج اور رینجرز کی تعیناتی کی منظوری دے دی ہے۔

خیال رہے کہ پی ایس ایل 8 کے میچز 13 فروری سے 19 مارچ تک ملتان، کراچی، راولپنڈی اور لاہور میں کھیلے جائیں گے۔