پاکستان کے کپتان بابر اعظم نے رکی پونٹنگ کی جانب سے تعریف کیے جانے پر کہا کہ یہ میرے لیے اعزاز کی بات ہے۔

تفصیلات کے مطابق آسٹریلیا کے سابق کپتان رکی پونٹنگ نے کہا کہ پاکستانی اسٹار مستقبل میں مزید ریکارڈ توڑنے کی صلاحیت رکھتا ہے، بابر اعظم نے رکی پونٹنگ کے ان الفاظ کو اپنے لیے اعزاز قرار دیا۔

رکی پونٹنگ نے آئی سی سی ریویو کے حوالے سے ایک پروگرام میں سنجنا گنیسن کو انٹرویو دیتے ہوئے کہا کہ پاکستانی اسٹار بابر اعظم اپنے کیرئیر کے بقیہ عرصے میں اور بھی زیادہ ریکارڈ توڑنے کی صلاحیت رکھتے ہیں۔

 رکی پونٹنگ نے مزید کہا کہ میرے خیال میں بابر اعظم کو ابھی تھوڑی بہت مزید بہتری کی ضرورت ہے۔

یاد رہے کہ بابر اعظم نے گزشتہ چار سالوں میں عالمی کرکٹ کے تینوں فارمیٹس میں پہلی بار ون ڈے کرکٹر آف دی ایئر اور سر گارفیلڈ سوبرز ٹرافی مسلسل دوسرے سال جیتی ہے۔

آئی سی سی ریویو پروگرام میں رکی پونٹنگ کہتے ہیں کہ مجھے اسے کھیلتے دیکھنا بہت اچھا لگتا ہے میرے خیال میں بہتری کی کچھ گنجائش ہے اور میں امید کرتا ہوں کہ اسے بہتر ہوتا دیکھوں گا۔

اپنی اس تعریف پر بابر اعظم نے کہا کہ رکی پونٹنگ نے جو کچھ کہا ہے اس کو سن کر بہت خوشی ہوئی ہے اور یہ الفاظ انہیں مزید اعتماد فراہم کریں گے۔

بابر اعظم نے آئی سی سی ڈیجیٹل کو بتایا کہ جب کوئی لیجنڈری کھلاڑی آپ کو داد دیتا ہے تو آپ کو اعتماد ملتا ہے اور آپ بہتر بننے کی کوشش کرتے ہیں۔”

بابر اعظم کا مزید کہنا تھا کہ جب اتنا بڑا کھلاڑی مثبت تبصرے کرتا ہے تو اس سے آپ کے اعتماد میں اضافہ ہوتا ہے اور آپ کے ذہن میں یہ ہوتا ہے کہ اتنا بڑا کھلاڑی آپ کے بارے میں اچھی بات کر رہا ہے۔