پاکستان کرکٹ ٹیم کے لیجنڈری بلے باز اور سابق کپتان جاوید میانداد نے بھارت کے پاکستان آنے سے انکار پر انہیں کھری کھری سنادی ہے۔

سابق کپتان جاوید میانداد کا کہنا ہے کہ اگر بھارت ایشیا کپ میں نہیں آتا تو بھاڑ میں جائے، پاکستان کو کوئی فرق نہیں پڑتا کیونکہ پاکستان کو کرکٹ مل رہی ہے۔

جاوید میانداد کا کہنا تھا کہ آئی سی سی اگر بھارت کو کنٹرول نہیں کر رہا تو گورننگ باڈی کا اور کیا کام ہے، آئی سی سی کو چاہیے کہ رولز سب کیلئے یکساں بنائے۔

انہوں نے بھارت کو تنقید کا نشانہ بناتے ہوئے کہا کہ انڈیا ہوگا اپنے لیے ہوگا، بھارت کو یہاں آکر کھیلنے اور ہارنے سے مصیبت ہوجاتی ہے۔

سابق کپتان کہتے ہیں ماضی میں بھارت شارجہ سے بھی ڈر کر بھاگا تھا، شکست پر وہاں وبال آجاتا ہے، ماضی میں گواسگر کو بھی ہار پر بھارتی عوام سے مسئلے ہوئے۔

جاوید میانداد کا عمران خان کو مشورہ

لیجنڈری بلے باز کا سابق وزیر اعظم عمران خان کو مشورہ دیتے ہوئے کہنا تھا کہ ’میں عمران خان کو گڈ لک بولتا ہوں، زندگی میں سب چلتا ہے گھبرانا نہیں چاہیے۔‘

جاوید میانداد نے کہا کہ انہیں فائٹ کرنی چاہیے اور اپنی غلطیوں کو ٹھیک کرکے چلنا چاہیے، سیاست میں اونچ نیچ ہوتی رہتی ہے لہذا انتظار کرنا چاہیے۔

انہوں نے مزید کہا کہ سب ایک دوسرے کی ٹانگیں کھینچتے رہتے ہیں، انتظار کرنا چاہیے کہ وقت آنے پر کیا کرتے ہیں۔