لاہور: پشاور زلمی کے کپتان بابر اعظم اپنے ہوم گراؤنڈ قذافی اسٹیڈیم‘ میں کھیلنے کے لیے پرجوش ہیں۔

پاکستان سپر لیگ (پی ایس ایل) سیزن 8 میں پشاور زلمی کے کپتان بابر اعظم کا پریس کانفرنس کرتے ہوئے کہنا تھا کہ ’لاہور میرا ہوم گراؤنڈ ہے، کافی دیر بعد کرکٹ کھیل رہے ہیں‘۔

انہوں نے کہا کہ ماضی میں جو غلطیاں ہوئیں اس کو بھول کر کم بیک کریں گے، کوشش کرتا ہوں جہاں سے آیا ہوں ویسا بن کر رہوں۔

لاہور قلندرز کے کپتان شاہین آفریدی سے متعلق بابر اعظم کا کہنا تھا کہ ’وہ دنیا کے بہترین بولر ہیں اور ان کو کھیل کر اچھا لگتا ہے، ہم اکٹھے رہتے ہیں لیکن آپس میں ہمارا مقابلہ رہتا ہے‘۔

ان کا کہنا تھا کہ فرنچائز کرکٹ میں مائنڈ سیٹ الگ ہوتا ہے، فرنچائز کرکٹ میں لوکل اور انٹرنیشنل کھلاڑیوں کو لے کر چلنا ہوتا ہے جب کہ کوشش ہوتی ہے کہ سب کو اکٹھا لے کر چلیں۔

بابر اعظم نے مزید کہا کہ صائم ایوب اور محمد حارث سمیت دیگر نوجوان کھلاڑی جتنی محنت کریں گے اتنا کھیلیں گے۔ افتخار احمد کو پیار سے چاچا کہا تھا، امید ہے وہ ایسے ہی کھیلیں گے۔

واضح رہے کہ لاہور کے قذافی اسٹیڈیم میں پی ایس ایل 8 کے بقیہ میچز کا آغاز کل سے ہوگا جس میں پشاور زلمی کا مقابلہ لاہور قلندرز سے ہوگا۔

پی ایس ایل 8 میں پشاور زلمی اب تک 4 میچز کھیل چکی ہے جس میں انہیں 2 میں کامیابی اور 2 میں ناکامی کا سامنا کرنا پڑا ہے جب کہ لاہور قلندرز 3 میچز کھیل کر 2 میں کامیابی حاصل کرچکی ہے۔