پولینڈ کے وزیر کھیل کا کہنا ہے کہ اگر پیرس اولمپک گیمز میں روس اور بیلاروس کے کھلاڑی شریک ہوئے تو گیمز کا بائیکاٹ ہو سکتا ہے۔

برطانوی خبر رساں ادارے کی خبر کے مطابق پولینڈ کے کھیل اور سیاحت کے وزیر کامل بورٹنیکزک نے کہا کہ روس اور بیلاروس کے کھلاڑی شریک ہوئے تو 40 ممالک اگلے اولمپک گیمز کا بائیکاٹ کر سکتے ہیں، جس سے پورا ایونٹ بے معنی ہو جائے گا۔

واضح رہے کہ پولینڈ کے وزیر کا یہ بیان پولینڈ، لتھوانیا، ایسٹونیا اور لٹویا کی جانب سے اولمپک 2024 میں روسیوں اور بیلاروسیوں کو مقابلے کی اجازت دینے کے منصوبے کو مشترکہ طور پر مسترد کرنے کے بعد سامنے آئے ہیں۔

یوکرین نے بھی دھمکی دی ہے کہ اگر ایسا ہوا تو وہ پیرس اولمپکس کا بائیکاٹ کر دے گا۔

لیکن آئی او سی نے جمعرات کو کہا کہ کوئی بھی بائیکاٹ صرف کھلاڑیوں کو سزا دے گا۔

کامل بورٹنیکزک نے کہا کہ ان کا خیال ہے کہ 10 فروری کو آئی او سی کے منصوبے پر بلاک بنانے کی حمایت کے لیے برطانیہ، امریکہ اور کینیڈا سمیت 40 ممالک کا اتحاد بنایا جا سکتا ہے۔

پولینڈ کے وزیر کھیل کامل بورٹنیکزک  نے مزید کہا کہ مجھے نہیں لگتا کہ اولمپکس سے پہلے ہمیں سخت فیصلوں کا سامنا کرنا پڑے گا اور اگر اولمپکس گیمز کا بائیکاٹ ہوا تو پھر یہ گیمز بے معنی ہو کر رہ جائیں گے۔ “

واضح رہے کہ آئی او سی نے گزشتہ ہفتے اعلان کیا تھا کہ وہ روسی اور بیلاروسی ایتھلیٹوں کو پیرس میں غیر جانبدار جھنڈے کے نیچے اولمپکس گیمز میں اجازت دینے کا راستہ تلاش کے گا۔

آئی او سی نے مزید کہا کہ کسی بھی کھلاڑی کو صرف ان کے پاسپورٹ کی وجہ سے مقابلہ کرنے سے نہیں روکا جانا چاہیے.

یوکرین کے وزیر کھیل وادیم گٹسیٹ نے کہا کہ ملک کے کھیلوں کے اداروں کو روسی اور بیلاروسی ایتھلیٹس پر پابندی برقرار رکھنے کے لیے بین الاقوامی فیڈریشنوں کے ساتھ “مواصلات کو مضبوط بنانے” کی ضرورت ہے۔

وادیم گٹسیٹ نے کہا کہ فروری 2022 میں یوکرین پر روس کے حملے کے فوراً بعد آئی او سی کی ایگزیکٹو کمیٹی روس اور بیلاروس کے کھلاڑیوں پر پابندیاں عائد کیں تھی۔

آئی او سی کے صدر تھامس باخ نے کہا گزشتہ سال ایتھلیٹس پر پابندی کا مقصد کھلاڑیوں کے لیے ایک حفاظتی اقدام تھا، لیکن اب ہم کہتے ہیں کہ کھلاڑیوں کے ساتھ امتیازی سلوک نہیں ہونا چاہئیے۔

گزشتہ روز لٹویا، لیتھوانیا، ایسٹونیا اور پولینڈ کے کھیلوں کے وزراء نے کہا کہ بین الاقوامی اولمپک کمیٹی کی جانب سے روسی اور بیلاروسی ایتھلیٹس کو غیر جانبدار پرچم کے نیچے بھی مقابلہ کرنے کے لیے واپس لانے کی کسی بھی کوشش کو مسترد کر دینا چاہیے۔