پی سی بی میں مکی آرتھر کی تقرری پر قومی ٹیم کے سابق کپتان مصباح الحق پھٹ پڑے ہیں۔

قومی ٹیم کے سابق کپتان مصباح الحق کا کہنا ہے کہ پاکستان کرکٹ کے لیے شرمناک بات ہے، بڑے کوچز آنا نہیں چاہتے جب کہ پی سی بی اس کوچ کی طرف دیکھ رہا ہے جو پاکستان ٹیم کو سیکنڈ آپشن کے طور پر دیکھ رہے ہیں۔

انہوں نے کہا کہ ہمیں خود کو الزام دینا ہوگا کیونکہ ہم نے نہ تو اپنوں کو عزت دی اور نہ کریڈٹ  جب کہ ہم نے اپنوں کا ہی امیج خراب کیا ہے۔

مصباح الحق کہتے ہیں سابق اور موجودہ کھلاڑی ایک دوسرے کی عزت نہیں کرتے، سابق کھلاڑی اپنے یوٹیوب چینلز کی ریٹنگ کے لیے دوسروں کے خلاف بولتے ہیں۔ اس صورت حال سے یہ تاثر بنتا ہے کہ ہم اس قابل نہیں ہیں۔

ان کا کہنا تھا کہ کھلاڑی اپنے شکوے اور شکایتوں کے لیے ایک دوسرے کے خلاف بولتے ہیں جس سے کرکٹ فینز میں یہ ثاثر پختہ ہوجاتا ہے جب کہ پاکستان کرکٹ اچھائی کی وجہ سے ہیڈ لائنز میں کم رہتا ہے۔

سابق کپتان کہتے ہیں کہ قومی چینلز پر سابق کرکٹرز اپنے ساتھیوں کا مزاق اڑاتے ہیں، یہاں پر ایک دوسرے کی عزت نہیں ہے اور کوئی بامقصد گفتگو نہیں ہوتی۔

کوچز کے حوالے سے گفتگو کرتے ہوئے انہوں نے کہا کہ پی سی بی ہمیشہ غیر ملکی کوچز کو بیک کرتا ہے، پی سی بی نے کبھی مقامی کوچز کو سپورٹ نہیں کیا جب کہ بورڈ غیر ملکی کوچز کا شوقین ہوتا ہے اور سمجھتا ہے کہ مقامی کوچز سیاسی ہو جاتے ہیں اور اس کے قابل بھی نہیں۔

انہوں نے انکشاف کیا کہ جب بورڈ دباؤ میں ہوتا ہے تو وہ مقامی کوچز کو بس کے نیچے پھینک دیتا ہے جب کہ پی سی بی میں بیوروکریسی کا احتساب نہیں ہوتا۔

مصباح الحق نے مس منجمنٹ اور تسلسل کے ساتھ تبدیلیوں کو خرابی کی بنیاد قرار دیتے ہوئے کہا کہ ہم نے اپنی کرکٹ میں کبھی مضبوط بنیادیں تلاش نہیں کیں جب کہ ایک عام بیانیہ ہے کہ پاکستان میں کوئی اس قابل نہیں جس کی وجہ سے بورڈ کو باہر دیکھنا پڑ رہا ہے۔

مصباح الحق نے کہا کہ افسوسناک چیز یہ ہے کہ ہماری پالیسیوں میں تسلسل نہیں ہے، بھارت جیسی کامیاب  ٹیمیں گھر کے کوچ کی طرف لوٹ چکی ہیں جب کہ ہمارے سسٹم میں بھی کئی اچھے لوگ موجود ہیں۔

انہوں نے مزید کہا کہ محمد اکرم، عاقب جاوید، انضمام الحق اور وقار یونس نے اچھی خدمات انجام دی ہیں لیکن ان کرکٹرز کی برے طریقے سے عزت کو خراب کیا گیا ہے جس کی وجہ سے لوگ سمجھتے ہیں کہ یہ لوگ جاب کے لیے اچھے نہیں ہیں۔

واضح رہے کہ پی سی بی مکی آرتھر کے ساتھ معاہدہ کرنے کے لیے کوشاں ہے جب اس سلسلے میں پی سی بی نے مکی آرتھر کے لیے ہیڈ کوچ کی بجائے ٹیم ڈائریکٹر کا عہدہ بھی متعارف کرایا ہے۔