افغانستان نے پہلے ٹی ٹوئنٹی میچ میں پاکستان کو 6 وکٹوں سے شکست دے دی ہے۔

پاکستان اور افغانستان کی ٹیموں کے درمیان تین ٹی ٹوئنٹی میچز پر مشتمل سیریز جاری ہے جس کا پہلا میچ آج کھیلا گیا جو افغانستان کے نام رہا۔

پہلے ٹی ٹوئنٹی میچ میں پاکستان نے ٹاس جیت کر پہلے بیٹنگ کرنے کا فیصلہ کیا جو غلط ثابت ہوا جب کہ افغانستان کے خلاف پاکستان کا ناقابل شکست رہنے کا ریکارڈ بھی آج ٹوٹ گیا ہے۔

افغانستان نے پہلے میچ میں 6 وکٹوں سے کامیابی اپنے نام کی اور پاکستان کی جانب سے 93 رنز کا ہدف صرف 4 وکٹوں کے نقصان پر 18 ویں اوورز میں پورا کرلیا۔

پاکستان کی اننگز

قومی ٹیم میں ڈیبیو کرنے والے صائم ایوب نے محمد حارث کے ساتھ اننگز کا آغاز کیا تاہم 17 رنز کے مجموعی اسکور پر محمد حارث 6 رنز بنا کر پویلین لوٹ گئے۔

 بعد ازاں عبداللہ شفیق بھی بغیر کوئی رن بنائے ایل بی ڈبلیو ہوگئے جب کہ صائم ایوب 17 رنز بنا کر نوین الحق کی گیند پر آؤٹ ہوئے۔

طیب طاہر 16 رنز پر راشد خان کو کیچ دے بیٹھے، جارح مزاج اعظم خان بھی بغیر کوئی رن بنائے آؤٹ ہوئے جس کے بعد پاکستان کی 41 رنز کے مجموعی اسکور پر آدھی ٹیم پویلین لوٹ گئی۔

کپتان شاداب خان 12، فہیم اشرف اور نسیم شاہ 2، 2 اور عماد وسیم 18 رنز بناکر آؤٹ ہوئے جب کہ قومی ٹیم مقررہ 20 اوورز میں 9 وکٹوں کے نقصان پر 92 رنز ہی بناسکی۔

افغانستان کی جانب سے فضل حق فاروقی، مجیب الرحمان اور محمد نبی نے 2، 2 کھلاڑیوں کو آؤٹ کیا جب کہ عظمت اللہ، نوین اور راشد خان نے ایک ایک وکٹ حاصل کی۔

افغانستان کی اننگز

ہدف کے تعاقب میں افغانستان کی ٹیم نے عمدہ کھیل پیش کیا اور 18 اوورز میں 4 وکٹوں کے نقصان پر ہدف عبور کرلیا۔

افغان ٹیم کی جانب سے محمد نبی اور نجیب اللہ زادران نے اچھی بیٹنگ کا مظاہرہ کیا اور اپنی لڑکھڑاتی ٹیم کو سہارا دیا جب کہ محمد نبی 38 اور  نجیب اللہ زادران 17 رنز بنا کر ناقابل شکست رہے۔

واضح رہے کہ اس جیت کے بعد افغانستان ٹیم نے 3 میچز کی سریز میں 0-1 سے برتری حاصل  کرلی ہے۔