پاکستان شاہینز کے کوچ محمد مسرور نے ایمرجنگ ایشیاکپ کے فائنل میں بھارت کے خلاف جیت کے دو اہم راز بتادیے ہیں۔

پاکستان نے فائنل میں بھارت کو 128 رنز کے بڑے مارجن شکست دی جس میں سفیان مقیم اور طیب طاہر نے اہم کردار ادا کیا جب کہ دونوں کھلاڑیوں کو گروپ مرحلے کے میچ میں آرام کروایا گیا تھا۔

پاکستان شاہینز کے کوچ محمد مسرور نے ایمرجنگ ایشیا کپ کے فائنل میں بھارت کے خلاف ٹیم کی جیت کی وجہ انہیں دو کھلاڑیوں کو قرار دیا ہے۔

محمد مسرور کہتے ہیں کہ دونوں کھلاڑی بھارت کے لیے “سرپرائز پیکج” تھے اور ٹیم میں ان کی شمولیت سے بڑا فرق پڑا۔

انہوں نے کہا کہ پاکستان نے گروپ مرحلے کے میچ میں سفیان مقیم اور طیب طاہر کو آرام دیا تھا کیونکہ قومی ٹیم پہلے ہی سیمی فائنل کے لیے کوالیفائی کرچکی تھی۔

محمد مسرور کہتے ہیں کہ ’’ہم نے گروپ مرحلے کے میچ میں بھارت کے خلاف اپنی پوری طاقت کی ٹیم نہیں کھلائی کیونکہ ہم پہلے ہی سیمی فائنل کے لیے کوالیفائی کرچکے تھے۔ ہم نے سفیان مقیم اور طیب طاہر دونوں کو آرام دیا اور وہ آج بھارت کے لیے سرپرائز پیکج ثابت ہوئے‘‘۔

واضح رہے کہ 187 رنز پر پاکستان کی پانچ وکٹیں گرچکی تھی اور قومی ٹیم مشکلات سے دوچار تھی تاہم طیب طاہر نے شاندار سنچری اسکور کرتے ہوئے 71 گیندوں پر 12 چوکوں اور 4 چھکوں کی مدد سے 108 رنز بنائے جب کہ ان کا اسٹرائیک ریٹ بھی 152.11 کے ساتھ متاثر کن تھا۔

یہ بھی پڑھیں: ایمرجنگ ایشیا کپ فائنل: دفاعی چیمپئن پاکستان کو مضبوط حریف بھارت کا چیلنج درپیش

بھارت نے اننگز کی شروعات اچھی کی اور بغیر کوئی وکٹ گنوائے 7 اوورر میں 64 رنز بنائے تاہم سفیان مقیم نے تین اہم وکٹیں حاصل کیں جن میں ابھیشیک شرما، یش دھول اور ہرشیت رانا شامل تھے۔

انہوں نے 10 اوورز میں 66 رنز دیے جب کہ طیب طاہر کی سنچری اور سفیان مقیم کی بولنگ قومی ٹیم کی جیت کے اہم عوامل ثابت ہوئی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں