محمد حفیظ نے بھی چیف سلیکٹر کے عہدے کے لیے عدم دلچسپی ظاہر کردی ہے جس کے بعد پی سی بی نے پھر آپشنز پر غور شروع کردیا ہے۔

ہارون رشید کے چیف سلیکٹر کے عہدے سے سبکدوش ہونے کے بعد ذکاءاشرف کی سربراہی میں نئی انتظامی کمیٹی اس عہدے کے لیے موزوں امیدوار کی تلاش میں سرگرداں ہے۔

گزشتہ دنوں پاکستان کرکٹ ٹیم کے سابق کپتان محمد حفیظ سے چیف سلیکٹر کے عہدے کے حوالے سے بات چیت ہوئی تھی۔

تاہم محمد حفیظ نے گراس روٹ لیول پر کام کرنے کی خواہش کا اظہار کرتے ہوئے چیف سلیکٹر کے عہدے میں عدم دلچسپی ظاہر کی ہے۔

ایک اور مایہ ناز سابق کرکٹر راشد لطیف نے بھی اپنی مصروفیات کے باعث اس وقت پی سی بی میں کوئی بھی عہدہ لینے سے انکار کردیا ہے۔

پاکستان کے سابق وکٹ کیپر معین خان کا نام بھی چیف سلیکٹر کے ممکنہ امیدوار کے طور پر بورڈ حکام کے سامنے پیش کیا گیا تھا۔

تاہم میڈیا رپورٹس کے مطابق معین خان اپنے بیٹے اعظم خان کے کیریئر کے خدشات کی وجہ سے اس طرح کے کرکٹ معاملات سے منسلک ہونے سے گریزاں ہیں اور انہیں خدشہ ہے کہ اگر وہ عہدہ سنبھالتے ہیں تو ان کے بیٹے کی کارکردگی پر غیر ضروری دباؤ آئے گا۔

واضح رہے کہ ایشیا کپ 2023 اور ورلڈ کپ 2023 سامنے ہے اور ایسے وقت میں ایک موزوں چیف سلیکٹر کی تلاش انتہائی اہم ہوگئی ہے۔

کچھ سابق کرکٹرز اس عہدے کو سنبھالنے کے حوالے سے خوفزدہ ہیں اور انہیں اندیشہ ہے کہ اگر ٹیم کی کارکردگی توقعات پر پوری نہ اتری تو انہیں تنقید کا سامنا کرنا پڑسکتا ہے۔

حکام اب چیف سلیکٹر کا عہدہ بھرنے کے لیے جدید کرکٹ کی مضبوط سمجھ رکھنے والے اسٹار کرکٹر کی تلاش میں ہیں۔ پاکستان کے سابق کپتان مصباح الحق مستقبل قریب میں اہم ذمہ داری سنبھال سکتے ہیں۔

تاہم ذکا اشرف کی آئی سی سی میٹنگز کے لیے جنوبی افریقہ روانگی کے باعث فیصلہ سازی کا عمل تاخیر کا شکار ہے۔

توقع ہے کہ وہ اگلے چند دنوں میں کچھ سابق اسٹار کرکٹرز سے ملاقات کریں گے اور اس پوزیشن پر بات کریں گے اور حتمی فیصلہ کرنے سے پہلے ان کی دلچسپی اور دستیابی کا اندازہ لگائیں گے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں