گال ٹیسٹ کے تیسرے روز سعود شکیل کی ڈبل سنچری کی بدولت پاکستان کو 135 رنز کی برتری حاصل ہوگئی ہے۔

گال میں پاکستان اور سری لنکا کی ٹیموں درمیان ٹیسٹ سیریز کا پہلا ٹیسٹ جاری ہے جس کے تسیرے دن کا کھیل آج مکمل ہوگیا ہے۔

تیسرے دن کے کھیل میں پاکستان ٹیم 461 رنز پر آؤٹ ہوئی جس کے بعد پاکستان کو 135 رنز کی برترتی حاصل ہوگئی ہے جب کہ سری لنکا نے بغیر کوئی وکٹ گنوائے دن کے اختتام تک 14 رنز بنالیے ہیں۔

پاکستان کی پہلی اننگز

قومی ٹیم کی جانب سے سعود شکیل نے انتہائی عمدہ بیٹنگ کا مظاہرہ کیا اور 361 گیندوں پر ڈبل سنچری کی بدولت 208 رنز بناکر ناٹ آؤٹ رہے۔

سلمان علی آغا 83 رنز بناکر پویلین لوٹ گئے جب کہ دونوں کھلاڑیوں نے ٹیسٹ میں چھٹی وکٹ پر 177 رنز کی سب سے طویل شراکت داری قائم کی۔

شان مسعود 39 رنز بناکر پویلین لوٹے جب کہ عبداللہ شفیق 19، امام الحق 1، کپتان بابر اعظم 13، سرفراز احمد 17، نعمان علی 25، شاہین آفریدی 9، نسیم شاہ 6 اور ابرار احمد 10 رنز بناکر آؤٹ ہوئے۔

سری لنکا کی جانب سے رمیش مینڈس نے 5 کھلاڑیوں کو پویلین کی راہ دکھائی، پربھاتھ جیاسوریا 3 اور کسن رجیتھا اور وشوا فرنندو نے ایک ایک کھلاڑی کو آؤٹ کیا۔

سری لنکا کی پہلی اننگز

سری لنکا نے ٹاس جیت کر پہلے بیٹنگ کرنے کا فیصلہ کیا تو ابتدائی 4 وکٹیں جلد ہی گرگئیں۔ اینجلو میتھیوز اور دھننجیا ڈی سلوا نے 131 رنز کی پارٹنرشپ کرکے ٹیم کو مشکل سے نکالا۔

تاہم بعد ازاں مزید کوئی کھلاڑی زیادہ دیر کریز پر نہ ٹک سکا اور پوری ٹیم 312 رنز بناکر آؤٹ ہوگئی۔ دھننجیا ڈی سلوا 122، اینجلو میتھیوز64 اور سمارا وکرما 36 رنز بناکر نمایاں رہے۔

پاکستان کی جانب سے شاہین شاہ آفریدی، نسیم شاہ اور ابرار احمد نے 3، 3 جبکہ سلمان علی آغا نے ایک وکٹ حاصل کی۔

واضح رہے کہ پاکستان اور سری لنکا کے درمیان گال میں کھیلا جانے والا یہ ٹیسٹ میچ ورلڈ ٹیسٹ چیمپئن شپ کا حصہ ہے۔