ورلڈ کپ 2023 میں پاکستان اور بھارت کے درمیان انتہائی متوقع میچ 15 اکتوبر کو احمد آباد کے نریندر مودی اسٹیڈیم میں کھیلا جانا ہے۔

پاکستان اور بھارت کی کرکٹ ٹیموں کے درمیان ہونے والے میچز شائقین کرکٹ کے لیے بے پناہ دلچسپی کا باعث ہوتے ہیں اور یہ مقابلے سب کی توجہ کا مرکز بھی ہوتے ہیں۔

ورلڈ کپ 2023 میں پاک بھارت ٹاکرا 15 اکتوبر کو ہوگا جس کے لیے بھارت میں ورلڈ کپ کے سرکاری نشریاتی ادارے ڈزنی اسٹار نے موقع سے فائدہ اٹھاتے ہوئے اشتہاری نرخوں میں نمایاں اضافہ کردیا ہے۔

میڈیا رپورٹس کے مطابق پاک بھارت میچ کے دوران ہر 10 سیکنڈ کے اشتہارات کے لیے 30 لاکھ بھارتی روپے کا مطالبہ کیا گیا ہے۔

دوسری جانب ورلڈ کپ کے دیگر میچز کے لیے ہر 30 سیکنڈ کے اشتہارکی معیاری شرح 7 لاکھ بھارتی روپے مقرر کی گئی ہے۔

ورلڈ کپ 2023 میں ہونے والے پاک بھارت میچ میں ناظرین کی تعداد میں ریکارڈ توڑنے کی توقع کی جارہی ہے جیسا کہ گزشتہ ورلڈ کپ میں دیکھا گیا تھا۔

پچھلے ٹورنامنٹس میں ہونے والے میچز نے بہت زیادہ سامعین کو اپنی جانب مبذول کروایا تھا جس میں پوری دنیا سے لاکھوں ناظرین نے ان مقابلوں کو دیکھا تھا۔

گزشتہ سال ہونے والے ٹی ٹوئنٹی ورلڈ کپ کے میچ کو ہاٹ اسٹار پر 1.8 کروڑ ناظرین نے دیکھا تھا جب کہ ایشیاکپ میں ہونے والے میچ کو 1.4 کروڑ ناظرین نے دیکھا تھا۔

2019 ورلڈ کپ کے میچ کو صرف بھارت میں 273 ملین ناظیرین نے ٹیلی ویژن پر دیکھا تھا جب کہ مختلف ڈیجیٹل پلیٹ فارمز پر 50 ملین اضافی ناظرین نے دیکھا تھا،یہ میچ اب تک کے سب سے زیادہ دیکھے جانے والے کرکٹ میچ کی حیثیت رکھتا ہے۔

دونوں ممالک کے درمیان جوش و خروش کو دیکھتے ہوئے ڈزنی اسٹار نے اس موقع سے بھرپور فائدہ اٹھانے کی کوشش کی ہے اور انہیں امید ہے کہ پاک بھارت میچ ایک منافع بخش منصوبہ ہوگا۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں