سری لنکا کے خلاف پاکستان کی لڑکھڑاتی بیٹنگ لائن کو بچانے کے لیے سعود شکیل اور آغا سلمان کریز پر ڈٹ گئے ہیں۔

پاکستان اور سری لنکا کی ٹیموں کے درمیان گال میں پہلا ٹیسٹ جاری ہے جس کے دوسرے دن کا کھیل بارش کی وجہ سے روک دیا گیا۔

دوسرے دن کے کھیل کے اختتام تک پاکستان نے 5 وکٹوں کے نقصان پر 221 رنز اسکور کرلیے ہیں جب کہ پاکستان کو اسکور برابر کرنے کے لیے 91 رنز درکار ہیں۔

پاکستان کی بیٹنگ

قومی ٹیم نے پہلی اننگز کا آغاز کیا تو سری لنکن بالرز کے سامنے پاکستان کا ٹاپ آرڈر ریت کی دیوار ثابت ہوا اور صرف 106 رنز پر ہی آدھی ٹیم پویلین لوٹ گئی۔

تاہم سعود شکیل اور آغا سلمان نے آکر بیٹنگ کو سنبھالا اور نصف سنچریاں اسکور کرکے گرین شرٹس کو واپس گیم میں لائے۔

امام الحق ایک، عبداللہ شفیق 19 ، کپتان بابر اعظم 13 اور سرفراز احمد صرف 17 رنز بناکر آؤٹ ہوگئے جب کہ شان مسعود نے قدرے بہتر بیٹنگ کرکے 39 رنز اسکور کیے۔

سری لنکا کی بیٹنگ

سری لنکا نے ٹاس جیت کر پہلے بیٹنگ کرنے کا فیصلہ کیا تو ابتدائی 4 وکٹیں جلد ہی گرگئیں۔ اینجلو میتھیوز اور دھننجیا ڈی سلوا نے 131 رنز کی پارٹنرشپ کرکے ٹیم کو مشکل سے نکالا۔

تاہم بعد ازاں مزید کوئی کھلاڑی زیادہ دیر کریز پر نہ ٹک سکا اور پوری ٹیم 312 رنز بناکر آؤٹ ہوگئی۔ دھننجیا ڈی سلوا 122، اینجلو میتھیوز64 اور سمارا وکرما 36 رنز بناکر نمایاں رہے۔

پاکستان کی جانب سے شاہین شاہ آفریدی، نسیم شاہ اور ابرار احمد نے 3، 3 جبکہ سلمان علی آغا نے ایک وکٹ حاصل کی۔

واضح رہے کہ پاکستان اور سری لنکا کے درمیان گال میں کھیلا جانے والا یہ ٹیسٹ میچ ورلڈ ٹیسٹ چیمپئن شپ کا حصہ ہے۔