پاکستان کرکٹ بورڈ مینجمنٹ کمیٹی کے چیئرمین ذکاء اشرف نے پاکستانی کرکٹ ٹیم کو سری لنکا کے خلاف ٹیسٹ سیریز میں وائٹ واش کرنے پر مبارک باد پیش کی ہے۔

پاکستان اور سری لنکا کی ٹیموں کے درمیان کولمبو میں دوسرا ٹیسٹ میچ جاری تھا جس میں قومی ٹیم نے اننگز کی فتح کے ساتھ سری لنکا کو سیریز میں بھی وائٹ واش کردیا ہے۔

پاکستان کی جیت پر کرکٹ بورڈ مینجمنٹ کمیٹی کے چیئرمین ذکاء اشرف نے کھلاڑیوں کو مبارک باد پیش کرتے ہوئے کہا کہ سری لنکا کے خلاف دونوں ٹیسٹ میچز اور سیریز جیتنے پر پاکستانی ٹیم کی جتنی تعریف کی جائے کم ہے۔

ذکاء اشرف کہتے ہیں کہ ٹیم نے ورلڈ ٹیسٹ چیمپئن شپ کا آغاز شاندار طریقے سے کیا ہے، سری لنکا کے خلاف ٹیم کی کامیابی کھلاڑیوں کی محنت اور ٹیم اسپرٹ کا منہ بولتا ثبوت ہے۔

انہوں نے کہا کہ کپتان بابراعظم اور پوری ٹیم مبارک باد کی مستحق ہے۔ یہ جیت ٹیم کو ایشیا کپ اور ورلڈ کپ کے لیے نیا ولولہ اور حوصلہ دے گی۔

انہوں نے مزید کہا کہ پاکستانی کھلاڑیوں نے دونوں ٹیسٹ میچز میں اپنی بہترین صلاحیتوں کا مظاہرہ کیا ہے۔

واضح رہے کہ میچ میں سری لنکا نے ٹاس جیت کر بیٹنگ کا فیصلہ اور پہلی اننگز میں 166 رنز پر ڈھیر ہوگئی جس کے جواب میں قومی ٹیم نے شاندار بیٹنگ کا مظاہرہ کرتے ہوئے پہلی اننگز میں 576 رنز پر اننگز ڈکلیئر کردی جب کہ پاکستان کے صرف 5 کھلاڑی آؤٹ تھے۔

سری لنکا کے خلاف دوسری اننگز میں قومی بولرز نے ایک مرتبہ پھر تباہ کن بولنگ کرتے ہوئے سری لنکا کی ٹیم کو 188 رنز آل آؤٹ کردیا جب کہ میچ کے ساتھ ساتھ پاکستان نے سیریز بھی اپنے نام کرلی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں