ایشیاکپ 2023 کے افتتاحی میچ میں پاکستان نے نیپال کو 238 رنز سے شکست دے دی ہے۔

ایشیاکپ 2023 کا آغاز آج سے ہوگیا ہے جس کے افتتاحی میچ میں پاکستان اور نیپال کی ٹیمیں مدمقابل تھیں۔

اس میچ میں پاکستان نے ٹاس جیت کر پہلے بیٹنگ کرنے کا فیصلہ کیا جو درست ثابت ہوا جب کہ قومی ٹیم نے 343 رنز ہدف کے تعاقب میں نیپال کو صرف 104 رنز پر ڈھیر کردیا اور 238 رنز سے کامیابی اپنے نام کی۔

پاکستان کی بیٹنگ

پاکستان کی جانب سے کپتان بابر اعظم اور آل راؤنڈر افتخار احمد نے جارحانہ اور عمدہ کارکردگی کا مظاہرہ کیا۔

بابر اعظم 14 چوکوں اور 4 چھکوں کی مدد سے 151 رنز بناکر آؤٹ ہوئے جس کے بعد وہ ون ڈے فارمیٹ میں ملتان اسٹیڈیم میں سب سے زیادہ رنز اسکور کرنے والے کھلاڑی بن گئے ہیں۔

دوسری جانب افتخار احمد نے 11 چوکوں اور 4 چھکوں کی مدد سے 109 رنز کی ناٹ آؤٹ اننگز کھیلی جب کہ وکٹ کیپر محمد رضوان 44 رنز بناکر آؤٹ ہوئے۔

علاوہ ازیں فخر زمان 14، امام الحق 5، محمد رضوان 44، آغا سلمان 5 اور شاداب خان 4 رنز بناکر آؤٹ ہوئے جب کہ پاکستان نے 6 وکٹوں کے نقصان پر 342 رنز اسکور کیے۔

نیپال کی جانب سے سومپل کمی نے 2 کھلاڑیوں کو آؤٹ کیا جب کہ کرن کے سی اور سندیپ لمی چنے نے ایک ایک وکٹ حاصل کی۔

نیپال کی بیٹنگ

ہدف کے تعاقب میں نیپال کا آغاز انتہائی مایوس کن رہا جب کہ پہلے ہی اوور میں شاہین آفریدی نے ان کے دو کھلاڑیوں کو آؤٹ کردیا، کشل بھرٹیل 8 اور کپتان روہت پوڈیل بغیر کوئی رن بنائے آؤٹ ہوگئے۔

عارف شیخ اور سومپل نے قدرے بہتر بلے بازی کی جب کہ عارف شیخ 26 اور سومپل کمی 28 رنز بناکر آؤٹ ہوئے، گلسن جھا بھی 13 رنز بناکر پویلین لوٹ گئے۔

پاکستانی بولرز نے نیپال کی بیٹنگ لائن کو بری طرح ناکام کردیا۔ شاداب خان 4 وکٹیں لینے میں کامیاب رہے، شاہین آفریدی اور حارث رؤف نے 2،2 کھلاڑیوں کو آؤٹ کیا جب کہ نسیم شاہ اور محمد نواز نے ایک ایک وکٹ حاصل کی۔

میچ کے بہترین کھلاڑی کا اعزاز کپتان بابر اعظم کے نام رہا جب کہ ایشیاکپ 2023 میں پاکستان کا اگلا مقابلہ 2 ستمبر کو روایتی حریف بھارت سے ہوگا۔

حالات حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں